Developed country nih tumin Viksit Bharat @2047 kalpui

Prime minister Narendra Modi chuan Thawhtanni khan inbiak hmuh theihna kaltlangin ‘Viksit Bharat @2047: Voice of Youth’ a tlangzarh.
India ram hi developing country a ni a, Viksit Bharat @2047 hmalakna atangin kum 2047 ah chuan India ram chu developed country nih a tum a ni.
Mizoram larsap Dr Hari Babu Kambhampati chuan Raj Bhavan atangin a lo chhim a. Program zawh veleh Mizoram University, ICFAI leh National Institute of Technology-a vice chancellor leh registrar-te hmalak dan tur a sawipui nghal.
Prime minister-in kum 2047 tawplama India ram developed country-a hlankai a nih theihnan hmalakna leh chona a chhawp chhuah chu ropui a tih thu larsap hian a sawi a. Developed country kan nih theihna turin khua leh tuite chu ‘developed citizen’ kan nih hmasak a pawimawh tih Prime minister-in a sawi chu a tuihnih a ni.
Developed country ni turin kan ramah hnathawktu zinga tam ber leh thahrui ngah zawk thalaite an pawimawh ber tih a sawi a. Thalaite chu Viksit Bharat @2047 hmalakna atana penchhuak turin a sawm. “Thalaite hi developed country kan nih theihna atana thawktu pawimawh ber leh a hlawkna teltu tur an ni,” a ti.
Thutkhawma tel institute hotute nen Mizorama ‘Viksit Bharat @2047: Voice of Youth’ kalpui dan tur ruahmanna a sawipui a. Vice chancellor leh registrar-te chu anmahni university hnuaia affiliated college leh educational institute zawng zawngte nen workshop nei tura chah nghalin, a remchang anga a thlirlet pui tur thu a sawi bawk.