‘Dhurandhar 2’-in box office record siam thei dawn
Ranveer Singh channa, Aditya Dhar direct Bollywood movie, Indian spy thriller ‘Dhurandhar: The Revenge’ chuan an tlangzarh atanga ni 13 chhungin net collection vaibelchhe 900 a hmuchhuak tawha, Hindi film zinga net collection-a cheng vaibelchhe 1,000 Indian box office atanga hmuchhuak thei hmasa ber ni turin an chhut.
Net collection tih chuan cinema hall ticket hralhna atanga sorkarin entertainment tax a lak leh tawh hnu a sum la bang zawng tihna a ni, India-a net collection atanga cheng vaibelchhe 1,000 tlin thei hi Hindi film zingah a la awm ngai lo a, mahse, hei hi Dhurandhar: The Revenge hian a rawn kai thei dawn ta niin an chhut a ni.
Dhurandhar 2 hian Thawhlehni kalta thleng khan net collection-ah cheng vaibelchhe 900.48 a tlin thei tawh a, gross collection (entertainment tax cut hma)-a cinema hall ticket hralhna atanga a lak luh chu India-ah cheng vaibelchhe 1,077.41 a tling tawh a, India ram pawnah vaibelchhe 358 la lut tawh bawkin, khawvel huapin cheng vaibelchhe 1,435.41 a la lut tling tawh a, a nitin cinema hall ticket hralh dan kalphung enin India-ah net collection cheng vaibelchhe 1,000 hi tlin thei ngei turin an chhut a ni.
India film zingah India-a gross collection-ah pawh cheng vaibelchhe 1000 chin la lut thei film hi a la tam lo hle a, Dhurandhar 2 hian cinema hall-a ni 11 a chhuah hnuah hei hi a thleng thei a, India-a cheng vaibelchhe 1,000 chin la lut thei dang ‘Pushpa 2: The Rule’ (cheng vaibelchhe 1,471.10), ‘Baahubali 2: The Conclusion’ (cheng vaibelchhe 1,416,90) leh ‘Dhurandhar’ (cheng vaibelchhe 1007.85) te a rawn zui ve ta a ni.
Dhurandhar 2 hian khawvel huapin cheng vaibelchhe 1435 chuang la lut tawh mahse khawvel huapa Indian film sum la lut tam ber chu a la pha lo viau mai a. Tuna he record siam mektu chu Aamir Khan channa ‘Dangal’ kha niin, cheng vaibelchhe 2,070 a la lut thei. He film hi China-ah a chetha hle a, China-ah ringawt cheng vaibelchhe 1,300 a la lut thei a ni. ‘Dhurandhar: The Revenge’ hi gulf ram thenkhata tlangzarh an remti lo a, China-ah tlangzarhna tumna an la nei rih lo bawk a, chuvangin ‘Dangal’ record hi chu a la ding rih dawn niin a lang.