Diabetics tan apple salad

Apple that zia sawi nan “an apple a day keeps the doctor away” (nitin apple pum khat ei ila dam-mawh hritlan a awm lo tihna ang deuh a ni e) an ti a, tunah chuan zunthlum te tan pawh apple hi a tha niin an sawi tlat mai. Apple-ah hian fibre a tam a, chu chuan zunthlum symptom hrang hrang a tiziaawm thei niin Times of India health section-in a tarlang. Apple-ah hian fructose leh antioxidant polephenols a awm a, chu chuan kan thisen luang vel a sugar in-absorb chak lutuk tur a timuang thei niin an sawi. Mithiam ten hmeichhiaah zirchianna an nei a, chuta tanga an hmuh dan chuan nitin apple ei ziah hian a risk 28%-in a tihniam thei niin an sawi.
Hriselna atana apple ei tam deuh i tum a nih chuan a tihdan tur tha ni a Times of India health section-in a tarlan te kan rawn chhuah chhawng a, apple salad te pawh diabetes diet a telh theih dan tur kan rawn tarlang e.
Green apple salad: Hei hi Thai cuisine niin, green apple zai pan (slice) leh olive, coriander (dhania), spring onion leh olive oil te chawhpawlh mai tur a ni. Duh leh khawizu tlem salad-ah chuan a telh theih bawk, mahse, khawizu telh hi chu mahni duh leh duh loh a ni e.
Apple, paneer leh channa salad: Chaw atan apple siam i duh em, tiffin a pai mai atan pawh a tha. Chickpeas tlem chhum so la, paneer tlem grill la, chumi zawhah a pahnihin, apple nen chawhpawlh leh mai tur a ni. Thlai hnah hring i pawlh bawk dawn nia. Hei hi a nutrition value a sang a, mi a tipuar rei duh bawk.
Apple leh celery salad: Apple zanpan (slice) leh celery chawhpawlh mai tur a ni. Celery-ah hian fibre leh potassium a tam a, apple nena a inpawlh pawh hian calorie a pai tlem a, BP sang tan pawh a tha hle.
Apple, pine nuts leh avocado salad: Bowl-ah apple, pine nut, cherry tomato, lettuce leh spinach te chawhpawlh la, hei hi lunch atana hmanah pawh a tha a, zanriah atan pawh a hman theih.