DiasporaHub-ah association80 chuang an inziaklut tawh

DiasporaHub-ah association
80 chuang an inziaklut tawh
Mizo DiasporaHub-ah Mizo Welfare leh association 80 chuang an inziaklut tawh a. Thenkhat erawh Mizoram chhunga pawl an ni.
Sawrkar din Mizo Diaspora Cell leh LushAITech tangdun siam, khawvel hmun hrang hranga cheng Mizote inthlunkhawmna tur internet portal – Mizo DiasporaHub chu Thawhtanni khan chief minister Lalduhoma’n a hawng.
Chief minister chuan, khawvel ram hrang hranga awm Zofate nena inthlunzawmna tha neih chu an rilruah a thi thei loa, an sawrkar ve leh chumi lam hna thawktu tur Mizo Diaspora Cell chu Chief Minister Office-ah an din a, a tir lamah ram pawna tangkhang tanpui ngaite an theih ang angin an tanpui a. Inthlunkhawmna lam an buaipui leh a, chu an hmalakna rah chu Mizo DiasporaHub siam hi a ni tih a sawi.
Welfare/ association ten tangkai takin he portal hi hmang a, registration ti turin a sawm tih sawiin, “Inhretawnin awm ila, tanpui kan ngaihnaah kan thawk dun anga, sawrkar thil kan inhrilhhre bawk ang. A bikin kan awmna rama harsatna tawk, sawrkar inrawlh a tulna thilah a tangkai zual ang. He apps-ah hian welfare-ten an inrelbawlna lama an tangkaipui theih tura ngaih thil kan dah tel a. Hei hi welfare thuneihna va chuhpui emaw va nekna emaw atana siam a ni lem loa, an awlsamna tur siamsakna zawk a ni,” a ti.
Mizo Diaspora Cell chairman, commissioner to CM Vanlaldina Fanai sawi danin, Diaspora Cell hi 2024 June 11-a din a ni a. A tir lamah chuan ram pawna harsatna tawkte chhanchhuah chu hna hmasaah an nei.
China-a Mizo zirlai tangkhang mek leh Cambodia lama harsatna tawk mekte tan hma an la mek a, Ministry of External Affairs nen tangdunin an bawhzui a ni. Tunhnaia Mizoram tlawha lo zin, Protector General of India Surinder Bhagat bulah engkim an lo thlen tih a sawi a ni.