Dikna…
DIET-a thawktute chenna tur DIET Quarter-ah thawktu ni ve lo a lo awm a ni awm a. Hei hi Mizoram Pradesh Youth Congress Committee (MPYCC) chuan nimin khan DIET quarter an tlawhnaah an hmuchhuak tih an sawi a. DIET Quarter-a lo awm hi chief minister campaigner niin an sawi a. Thu an zawhfiahna atanga a lan dan chuan ZPM party-a nihna sang tak pakhatin quarter-a awmnaah hian a hming a tum niin an sawi bawk.
Hemi chungchang hi nimin vek khan social media-ah a darh nghal a. Thil awmzia hmuchhuaktu MPYCC lam hi an thil hmuhchhuahah an chiang tawk hle niin a lang bawk a, hetiang thil a thleng hi a dik lo hle mai a, Dikna hmachhuan thin party huang chhunga thil thleng atan chuan thil inhmeh lo tak a ni.
Tun hnai lawkah Social Audit Unit Mizoram chuan social audit thlirletna hun an hmang a, Mizoramah social audit tum 3500 vel neih tawh a nih thu report tarlan a ni a; hei hi a bikin MGNREGS hnuaiah a ni awm e. Ni za inhlawhna hi khawsak harsa zawkte dawmkanna tur a nih rualin, mipuiin mahni tha ngei thawha ram leh hnam hmasawnna hna a taka an thawh a, thahnemngaihna rilru an neih ve theihna tura buatsaih a ni tel bawk awm e. Kan Ni 100 inhlawhna hmang hian eng ang hmasawnna nge kan state tan hian kan thawh chhuah ve tak? tih hi zawhna pawimawh tak a ni ang a. |um 3500 zet social audit neih tawhah khan, kan thawh that dan leh kan thawh chhiat dan hi mipui hian chipchiarin kan hre pha ve lo a, social audit neitute hian an puangzar em em bawk si lova, thawh dik loh leh thawh thatloh puanzar tur awm lovin kan thawk tha em em vek mai niawm tak a ni. Mahse, hei leh chen hi Ni 100 inhlawhna hi kan lo kalpui ve tawh a, ni za inhlawhna hmanga rothil (asset) ve deuh kan buan chhuah hi sawi tur a tam vak lo a ni mahna. Kan dik thlup a ni ang.
Sawrkar hnathawkte chenna tura siam ni na na na, sawrkar hnathawk quarter chang lo tam tak an awm laia sawrkar hnathawk ni ve lo quarter-a lo awm ve kuk hi, a awm theih dan an sawi hi a dik a nih chuan thil zahthlak tak a nih piah lamah, dan bawhchhiatna a ni a. Hetiang awmtir theitu nia sawite lah an hraw em em mai si a, Dikna hmachhuan ber anga insawi tan chuan a dik lo hle si… Han insawifiah hlawm teh se…