DIPRO thar leh MJA inkawm

Lawngtlaia district information & public relations officer thar Hmingthanzuala leh Mizoram Journalists’ Association Lawngtlai district member-te chu Nilaini khan Lawngtlai Press Club-ah an inkawm a. Thuthar thehdarh kawnga thawhho dan tur an sawi.
DIPRO chuan thuthar thehdarh hna chu hna hautak leh inpekna thuk tak ngai a nih angin ram leh hnam tana rawngbawlna anga ngai chung a thawh a tul tih a sawi a. Khawvel changkanna ina a ken tel media platform hrang hrang hmanthiam a tul thu leh mipui nawlpui tana thil tangkai leh chhawrtlak thehdarh tam a pawimawh thu a sawi. MLA inthlanpui kum a nih angin mahni duhthlanna dik hmang tura mipui zirtir kawngah te, vote thlak ngaipawimawh tura inzirtir tam a pawimawh thu te a sawi bawk.
MJA Lawngtlai president Lalngheta Ralte chuan Lawngtlai district-ah MJA member 10 leh nitin chanchinbu chhuak 5 a awm mek tih a sawi a. MJA member leh an chenpuite hriselna enkawl kawnga hamthatna ruahman a nih dan te, Lawngtlai District MJA Pension Scheme kalpui a nih thu leh mipui tan chanchinbu kaltlanga thu rintlak leh belhchian dawl chauh chhawpchhuah a nih theih nan Media Campaign & Journalist Workshop buatsaih a nih thin thu te a sawi a ni.
Inkawmnaah hian electronic media hman tangkai theih dan, sawrkar advertisement kalphung leh election kaihhnawiha a tulna apianga mipui zirtir tura thawhho dante sawi a ni.