District Council-te hmangaihtu ber chu Congress party – MPCC

District Council-te hmangaihtu ber chu Congress party – MPCC
District Council-te ngen fo thin direct funding thlawptu leh tihhlawhtlin theihna’na hma latu chu anmahni an ni a, District Council hmangaihtu ber party an ni bawk tih Congress chuan an sawi.
MPCC thuchhuak chuan, Assembly thutkhawma District Council & Minority Affairs minister Pu R Lalzirliana’n District Council-te direct funding chungchang a sawinaah vote zawn nana hmang mai mai leh District Council lama chengten an lo awih sak ve em em ni anga a sawi chu ADC nei Lai, Mara leh Chakma te rilru a ti na a, political party leh NGO-ten demna thuchhuah siamin ngaihdam dil tura an phut bakah DC&MA minister dang dah turin chief minister an ngen tih a sawi a ni.
Minister R. Lalzirliana hian Assembly House-ah ngaihdam dilin, DC&MA department enkawltu a nihna pawh tidanglam turin a ngen tih a sawi bawk.
Ngaihdam dil ngai khawpa thu sawisual hi mi thenkhatten Congress party beihnaa an hmang talh chu ngaihdam diltu leh ngaidamtute tihbawrhbanna a ni, tiin, huat tlakah ngai nise Congress party chu Pu R Lalzirliana thusawi haw ber tur an nih laiin, thudik tarlanna remchangah an hmang zawk tih a sawi.
2009 July 14 & 15 khan CM Pu Lal Thanhawla leh MP (LS) Pu CL Ruala-ten sawrkar laipuiah direct funding dilna hi ngenpuina an lo thlen tawh thu te; 2017 August 17-a Council of Ministers thukhawm chuan District Council-te direct funding pek hi thlawpin, a kalphung, financial control mechanism leh administrative structure /set-up chu India sawrkarin duang se,’ tia an lo dah tawh thu te a sawi a ni.
‘Congress party hi District Council-te leh a chhunga chengte hmangaih bertu a ni tih chu anmahni hian an hrechiang a. Kawng hrang hrangin kan la hmangaih chhunzawm zel dawn. Pu R. Lalzirliana’n thu a sawisual avanga ngaihdam a dilna hi kan ngaidam a, ngaihdam dil ngai loa thu sawi thin tawh turin kan duh a ni,’ thuchhuah chuan a ti.