District MJA-ten conference hmang

District MJA-ten conference hmang
Zirtawpni khan District MJA 5-in annual conference an hmang a. Kum 2026-2028 chhunga hruaitu tur thlang nghalin, sawrkar hnena thlen tur resolution nei an awm.
MJA Lunglei District chuan Lunglei Press Club-ah an hmang a. Resolution an neih chu – Mizoram State University Lungleia awm tura chief minister Pu Lalduhoma’n HPC Office Lungleia a puan kha MJA Lunglei chuan lawmawm a ti a, CM leh a kaihhruai sawrkar chungah lawmthu a sawi a. Mizoram State Assembly-ah Aizawla awm tura pass lo ni tawh mah se, Lungleiah awm tura CM-in a puan ang ngeiin, Mizoram State Legislative Assembly Budget Session-ah Bill pass tawh siamtha (amend) a, Lungleiah ngeia awm tura House-a pawm turin an ngen tih a sawi a ni.
MJA Lunglei District hian president atan H Lalthansanga, vice president – F Lalngaihzuala, treasurer – K Lalrinpuia an thlang a. Executive member mi 5 an thlangchhuak bawk.
MJA Champhai District chuan Champhai Press Club-ah an hmang a. Resulution an pawm zingah – Mizoram khawchhak lama thalaite tana zirna sang zawk a awm theihna tura Champhai NGO hmalak mekna chu an thlawp tih sawiin, State University campus emaw post graduate zirna emaw Champhaia dah sak turin Mizoram sawrkar a ngen tih a sawi. Champhaia inkalpawhna kawngpui chhe lutuk chuan mipui tan harsatna a thlen tam tam tawh avangin a rang thei anga siamsak turin sawrkar an ngen a; NH-06 (Khankawn) atanga Champhai Kanan Veng kawngpui sial zauna tur leh Khankawn to Zote Road via Falkawn Ring Road Phase-I sialna tura ram petute fakawm an tih thu sawiin, heng kawngpui hi a rang lama zawh a nih theihnan hma la turin thawktute an beisei tih a sawi.
MJA Champhai District hian president-ah Lalhlupuia, vice president – C Lalhnunpuia, treasurer-ah C Lalrinsanga an thlang a. Executive member 5 an thlangchhuak bawk.
MJA Serchhip District chuan Serchhip Press Club-ah an hmang a, I&PR deputy director Andrew Lalremruata bakah MJA Gen Hqrs. atangin general secretary K Zothanpara hoin an hmanpui a. DRDO Serchhip project director Dr Malsawmtluanga Fanchun chuan a hmanpui bawk. Hruai atan president – Kapliana Pachuau, vice president – Lalremruata Ralte, treasurer – Zonunsanga Kawlni bakah executive member mi 5 thlanchhuah an ni.
MJA Lawngtlai District pawhin Lawngtlai Press Club-ah an hmang a, bawrhsap Donny Lalruatsanga’n a hmanpui. Rorel inkhawmah MJA Lawngtlai chuan an district kaltlanga India leh Myanmar inkar, a bikin Rakhine State nen sumdawnna kal mek chu ram leh mipui himna ngaihtuah chungin awmze nei zawka kalpui an duh tih an sawi. Hruaitu thar atan president – Elvis Lalthangzuala, vice president – H Lalrinmawia, treasurer – Lalngheta Ralte an thlang.
MJA Siaha District chuan Siaha Press Club-ah ah an hmang a, Siaha SDC Zorinsangi’n a hmanpui. Resolution pass in, kum 2025-a Mizoram district fai inelnaah Siaha Town pakhatna a ni chu lawmawm an ti a, LAD, VC, NGOs thawhhona vang a ni, tiin, kum 2026 ah pawh he lawmman dawng leh tur hian tan la zui zel turin MJA chuan Siaha mipui an chah tih an sawi. Hruaitu atan president – CZ Hluna, vice president- J Jeffrey Khara, treasurer – V Pawhla thlan an ni.