District pahnihin oil palm MT 6000 chuang an hralh

District pahnihin oil palm
MT 6000 chuang an hralh
Mizoram-a oil palm chingtu tamna ber Kolasib leh Mamit district-in nikum chhung khan metric tonne 6000 chuang an hralh.
Agriculture & Farmers’ Welfare department Kolasib hnuaiah oil palm rah hi nikum April atanga kumin January thleng khan metric tonne 2362 an hralh tawh a. Hei hi cheng nuai 354 man hu a ni. 2025 April atanga December chhung khan Mamit district-ah oil palm metric tonne 3645 hralh a ni ve thung a, district pahnih hralh zat belhkhawm hi MT 6007 a ni.
Kolasib district-ah hian oil palm chinga eizawng chhungkaw 250 an awm mek a, Nikum chhung khan oil palm tiak 55627 chuang semchhuah a ni.
National Mission on Edible Oils – Oil Palm (NMEO-OP) hnuaiah nikum khan Mamit district-a oil palm chingtute huan panna kawng thawmthat a ni a. April atanga December 2025 chhung khan an district-a khaw 27-ah oil palm tiak 66948 leh a rah lawhna hmanrua a chingtu mi 338 hnenah sem a ni bawk.