Ni 90 inhlawh tling lo la awm

Ni 90 inhlawh tling lo la awm
Ni 100 inhlawhna, tia hriat – MGNREGS ah sawrkar kum kal mek chhungin thla hnih vel chauh a awm tawh chungin, ni 90 la inhlawh tling lo district an awm nual.
MGNREGS chungchang hi Thawhtannia district hrang hranga Republic Day 2026 hmannaah khuallian atana hman district bawrhsap-ten an sawichhuak a. Bawrhsap thenkhat chuan an sawi lang lo hrim hrim a, thenkhatin an ni inhlawh tawh zat an sawilang lo thung.
An inhlawh tawh zat ni (day) sawilang zingah Lunglei district chu ni 100 hnaih ber an ni a, ni 91 an inhlawh tawh. An district-ah hian job card nei 20537 awmin, kum 2025- 2026 atana ni 91 inhlawhna siam tawhah hian cheng nuai 5122.39 an hmang.
Inhlawh tawh zat tarlang zingah Champhai district chu la che chhuak tlem ber an ni a, 2025 April – November record an pholanah ni 72 an thawk tawh.
Serchhip district-ah MGNREGS hnuaiah kumin chhungin ni 86 inhlawhna siam tawh niin, mipui inhlawhna atan cheng nuai 12.14 sen a ni. Mamit district-ah job card 24794 nei tan ni 88 inhlawhna siamsak an ni tawh.
Hnahthial district-ah kum 2025-26 chhung hian MGNREGS hnuaiah hna chi 920, Rs. 16,95,65,584 sengin thawh a ni a. job card nung lai 6880 a awm a, ni 89 inhlawhna siamsak an ni tawh.
Saitual district-ah job card nei 12430 an awm a, January kal mek thleng hian inhlawhna ni 87 siamsak an ni.
Kolasib district-ah chuan kum 2025 chhung khan ni 100 inhlawhna hnuaiah hna chi 2170 thawh a ni a, heng hna thawhna atan leh thawktu hlawh leh inrelbawlna atan cheng nuai 4916.21 hman a ni.
Lawngtlai district-ah kum 2025 atan job card nei mi 42236 awmin, hna 2474 thawh a ni a, cheng nuai 8,864.34 hman a ni.