District parukah ASF leng mek

March thla chawhnu lam atangin Mizoramah African Swine Fever (ASF) a leng a, he hri lenna district a pung; tunah chuan Mizoram district parukah finfiah a ni tawh.
March ni 20-ah ASF hi hriat tan a ni a, chumi hnuah hun engemaw chen chu district pali, Mamit, Lawngtlai, Siaha leh Lunglei district-ah chauh ASF hi a leng. July ni 6-ah Khawzawl district a lang a, district pangaah he hri hi hmuh a ni ta. July ni 21-a AH&Vety department report-ah Champhai district a lang ve leh a, kumina ASF finfiahna chu district paruk a ni ta a ni.
July ni 21-ah hian Champhai district-ah vawk 18 a thi a, paruk tihhlum (cull) a ni bawk. Mahse vanneihthlak takin Champhai district-ah hian Zirtawpni thleng khan vawk a thih belh lo a, he hrileng hi a nasa vak rih lovah ngaih a ni.
AH&Vety department hotute chuan ASF finfiahna hmasaah a zia tawh thung an ti a, finfiahna awm belh mah se a len hmasaknaah a zia avangin, kum hmasa lam anga nasa a ni lo an ti.
Kum danga a len dan enin June leh July hi a nasat hun a nih thin thu an sawi a, kuminah July thla tawp lam a ni tawh a, kum hmasa angin kuminah a la nasa rih lo an ti.
An chhinchhiah danin, July ni 25 thlengin kuminah district paruka khaw 100-ah ASF hi finfiah a ni tawh a, he hri vang hian vawk 6296 a thih tawh bakah vawk 2362 tihhlum a ni tawh. ASF hi enkawl dam theih a nih loh avangin a darh zel loh nan a vei chu tihhlum a ni thin.
A chhungkua zawngin, ASF hi chhungkaw 2369-in an tuar tawh.