District viltu hoin VBSY hmang

Sawrkar laipui ruahmanna hrang hrang inzirtirna, Viksit Bharat Sankalp Yatra (VBSY) kalpui mekah Kolasib district prabhari officer Devendra Kumar Nim hoin Ningani khan district chhunga khaw pahnih – Pangbalkawn leh Saihapui K-ah VBSY hnuaia thil pawimawh inzirtir a ni.
District prabhari officer hi Kolasib additional DC Melody Ngurthantluangi leh line department hotuten an tawiawm a. Heng khaw pahnihah hian line department aiawhten an department hnuaia sawrkar ruahmanna an sawifiah bakah beneficiary-te hnen atangin scheme an hlawkpui dan ngaihthlak a ni. Mipui tan Ayushman Bharat Card siamna leh ngawr (TB), zunthlum leh thisen sang awm leh awm loh a thlawna endik niin, PM Ujjwala hnuaia a thlawna gas connection neih theihna tur leh loneitute tana Kisan Credit Card loan dilna tur inziahluhna leh PM-Kisan leh scheme chi hrang hrang hnuaia inziahluhna hun buatsaih nghal a ni. Drone hmanga lei tha leh hlo pek dan leh lei that dan endik theih dan a taka entir, a ni bawk.
Kolasib district prabhari officer Devendra Kumar Nim hi National Human Rights Commission joint secretary a ni.