Djokovic a chak nghal

July 3, Thawhtan tlai atanga khan Tennis-a inelna lian Wimbledon 2023 khelh tan a ni a. Wimbledon 2023 tan nia inkhel ngaihven hlawhah champion lai Novak Djokovic chuan set hloh lovin Pedro Cachin a hneh a, second round a lut.
Wimbledon-ah vawi li ngawt champion zawn tawh Djokovic hian a ropuina Centre Court-ah bul a tan. Centre Court a Djokovic tlawm hnuhnun ber tum chu kum 2013 final-ah Andy Murray a hneh lo kha a ni a. Murray a hneh loh bak hi chu Centre Court-ah hneh thei an la awm lo. A ropuina mualah tha takin bul a tan a, ruah surin an inkhel ti khaihlak zeuh mah se set hloh lovin a chak tho thung.
Player ngaihven hlawh Djokovic hian Argentine Pedro Cachin lakah tha takin bul a tan a, break a neih chhawr tangkaiin set khatna leh set hnihnaah game thum ve ve chauh hlohin set a la. Set thumnaah Cachin khel tha hretin, tie-break hial thleng thei mah se boruak sang leh hun pawimawha chetha thin Nole lakah a kawng zo lova, Argentine Cachin hian set a loh nawn leh. Centre Court a mipui lawm hlawh Djokovic chuan 6-3 6-3 7-6 (7-4) in hnehna a chang a, second round a lut. Wimbledon-ah vawi 29 zet chak zawn tawh Djokovic hian second round-ah Australian Jordan Thompson a hmachhawn zui leh ang.
Centre Court-a Djokovic leh Pedro Cachin te inkhel hi ruah sur vangin minute 80 chhung zet a khaihlak. Field chhuata tui tling tihro tumin Djokovic hian a hrukpuanin a hru a, hei hian lawm a hlawh hle nghe nghe. Grand Slam-ah vawi 23 champion tawh Djokovic hi Wimbledon-ah a champion nawn leh a nih chuan Roger Federer leh Margaret record a nih rual dawn. Record pa hnih nihrual thei din-hmuna ding a nih vangin Serbian pa huai-sen hian ngaihven a hlawh phah hle.
Result dang:
Thawhtan zana inkhel dangah champion tura rinkai zing a mi Casper Ruud leh An-drey Rublev ten hnehna changin second round an lut ve bawk.
Grand Slan final-ah vawi thum ngawt tlawm zawn tawh Casper Ruud chua a khingpui LaurentLokoli
chu 6-1, 5-7, 6-4, 63 in a hneh. Quarter-final-ah Djokovic hmachhawn thei dinhmuna ding Andrey Rublev chuan a khingpui Max Purcellchu 6-3 7-5 6-4 in a hneh a, second roound a inhlang-kai ve bawk.