India player \ha ber

Lunglei tlangval Lalian-zuala Chhangte (LZ Chhante) chu India rama footballer tha ber ‘AIFF Men’s Footballer of the Year 2022-23’ ah thlan a ni a. LZ Chhangte hi Mizo zingah India player tha bera thlan pahnihna niin, Jeje Lalpekhlua hnung a zui.
Mumbai City FC winger Lallianzuala Chhangte hi season liam ta khan club leh ram tan a che tha hle a, inelna hrang hrangah dan theih loh ang maiin a inlan thin. Indian Super League (ISL) ah Mumbai City FC tan vawi vawi 22 khelin, goal 10 a thun a, assist vawi ruk zet a nei bawk a. ISL League champion an nih theih nan a thawhhlawk hle. ISL-ah goal a thun thei a, a thiante goal thun tur a siamsak thei tel bawk nen chawimawina ngaihhlut hlawh tak ‘ISL 2022-23 Player of the Season’ a dawng nghe nghe.
Mumbai City FC hi ISL League champion ni mah se play-off semi-final-ah Benga-luru FC lakah vanduaiin final an lut zo lo. ISL play-off semi-final-a an ngam loh Bengaluru FC bawk hi Durant Cup final-ah an ngam lo zui leh a. Final hmuhnawm takah 2-1 tlawmin LZ Chhangte khelhna Mum-bai City FC an champion zo lo. Durant Cup-ah pawh LZ Chhangte hi a chetha leh viau a, khelh sarih atanga goal sarih ngawt thunin assist vawi thum ngawt a nei a. He inelnaah hian LZ Chhangte hi Top-scorer a ni nghe nghe.
ISL leh Durant Cup-ah ropui takin inlan mah se Mumbai City FC hi Hero Super Cup-ah beisei an phak ta lo thung. Hero Super Cup-ah hian LZ Chhangte hian khel thum atangin goal khat a thun.
Club tan inelna hrang hranga a chetthat ang bawkin LZ Chhangte hi ram tan a chetha zui viau bawk. Season liam ta khan Lianzuala hian India tan vawi 12 a khel a, goal hnih thunin assist vawi hnih a nei tling bawk. Hero Inter Continental Cup-ah India an champion theih nan Lianzuala hian a thawhhlawk viau a, Final-ah Lebanon an hma-chhawn tumin assist tha tak a neih bakah goal khat a thun bawk. Hero Inter Continental Cup final-ah hian ‘Man of the Match’ ah thlan a ni hial a. ‘Best player’ ni tura beisei ni mah se uiawm takin a ni ta lo thung.
Inter Continental Cup-ah an champion hnuin Lianzuala te hian SAFF championship an hmachhawn zui leh nghal mai a, hahchawlhna hun pawh an nei hman meuh lo. SAFF Championship-ah pawh mit la takin an inlan zui leh a, final lutin nizan dar 7:30 khan India leh Kuwait ten final an khel tan a, result kan tarlang hman lo. Club leh Ram tan inelna hrang hranga chetha tak Lallianzuala Chhangte in ‘2022-23 AIFF Men’s Footballer of the Year award’ a dawng hi a phu a, PostSport chuan a lawmpui tak zet zet a ni. He chawimawina dawng turin LZ Chhangte hian a elpui pahnih Nandhakumar Sekar leh Naorem Mahesh Singh te a khum. He chawi-mawina hi Mizo player Jeje Lalpek-hlua chuan kum 2026 khan a lo dawng tawh bawk a. Jeje Lalpekhlua hi Mizo zingah he chawimawina dawng thei hmasa ber a ni.
All India Football Federation (AIFF) chuan July 4, Thawhlehni khan Bengaluru-ah an nei a. He hunah hian Pu Lalnghinglova Hmar leh Pu Lalrawngbawla, MFA Asst. Secretary te an tel. He meeting ah hian player chawimawina sang dawng tur hi puanchhuah an ni.
LZ Chhangte in mipa lama chawimawina sang a dawn laiin hian Akash Mishra chu rawlthar tha berah thlan niin, ‘Emerging Player of the Year award’ dawng tura thlan a ni a. Hmeichhe lama chawimawina sang he chawimawina kawl mektu Manisha Kalyan chuan dawng nawn lehin ‘AIFF Women’s Footballer of the Year’ a ni nawn leh a. Kum 16 mi Shilji Shaji chu tleirawl tha berah thlan a ni a. Indian Super Cup-a Odisha FC champion puitu Clifford Miranda chu coach tha berah thlan a ni ve thung.