January 28, Pathianni tlai khan Australian Open 2023 chu ropui takin khar a ni ta a. Finalah hmuhnawm takah set hloh lova Stefanos Tsitsipas hnehtu Novak Djokovic chu Australian Open ah a vawi 10 nan a champion a. World No. 1 thar Djokovic hian Grand Slam a champion ngun ber Rafael Nadal record a nihrual chiah bawk.
-- Advertisement --
Tsitsipas a kal zel
Melbourne Park ah vawi kua zet champion tawh leh champion leh tura rinkai ber Novak Djokovic hian vawi 10 a lo hneh tawh Stefanos Tsitsipas lakah a khel tha leh viau. Serb fourth seed Nole hian awlsam taka set khatna a lak hnuin set hnih dangah fiahna hautak a paltlang hram a. Boruak sang leh hun pawimawha huaisen zawk a nih a chhawr tangkai a, tie-break ah chungnun zawnin set hnihna leh set thumna a la zawn.
Rinlawk ang ngeiin Djokovic hian Tsitsipas lakah bul a tan tha a, hma taka break a neih chhawr tangiin set khatna chu game thum chauh hloh chungin a la. Set khatna a hlo hnuin World No. 1 thar ni thei dinhmuna ding Tsitsipas a khel tha chho ta viau a, a khingpui nen an inchai tawk ta viau. Set hnihnaah hian game an inlak chhawk zak zak a, break nei thei an awm loh vangin tie-break hmanga thelh an ngai. Tie-break ah Greek tlangval Tsitsipas hian chhe takin bul a tan a, a khingpui nawr let tha viau mahse set la tur khawpin a thochhuak zo lova, set a hloh leh ta nge nge.
Set hnih a la zawn a, champion a hnaih viau tawh laiin set thumnaah mipui tan rawn Djokovic-a’n bul a tan chhe viau thung a, a serve hmasa ber a hum zo lo nghal ringawt. Break pawimawh tak a neih nghal vangin Tsitsipas hian set lak ve mai rinna lian tak a awm hman a, amah tantute pawh an phur hman viau nghe nghe. Player paukhau, fei leh huaisen Djokovic hlauhawmzia a lan chiang ta chiah thung a,, a serve a hum zawh loh hnuin a khingpui a break let nghal chat. Set thumna game hnih chhunga break an neih ve ve hnuin an serve an hum zui zel a, Djokovic-an hma a hruai zel vangin Tsitsipas tan chetsual a thiang lo. Fimkhur taka inlan dun in, tie-break hmang bawka thelh an ngai zui leh. Set thumna tie-break ah hian chhe zual zawkin Tsitispas-a’n bul a tan a, 5-1 ngawtin hnufual zawkah a ni. Champion hnaih tawh tak Djokovic pawhin point a hloh zawn ve leh a, a khingpui nen an inhnaih leh hman viau tawh. Vawikhat tihdik a, champion theihna hun tha a neih chu tum hnih a chhawr tangkai lo zet a. Boruak sang tak hnuaiah a hun tha neih hnuhnung chhawr tangkai hramin set pawimawh tak a la zui leh a. Stefanos Tsitsipas lakah 6-3, 7-6, 7-6 a chakin, a vawi 10 nan a champion.
Australian Open ah a vawi 10 nan a champion leh tak vangin Djokovic hian ranking point 2000 ngawt a hmuh belh a. Vawiina ATP Ranking tihchhuah tharah World No. 1 a ni thar a. Final-a a hneh tak Tsitsipas pawhin pen khata hma lam pan in, World No. 3 thar a ni bawk. Ranking chhuak tharah hian Australia Open khelh zawh thlenga No1. Carlos Alcaraz chu No. 2 ah a thla thla a. No. 2-a awm thin Rafael Nadal chu No. 6-naah a tla hniam ve thung.
World No. 1 thar Djokovic hi Grand Slamah vawi 22 a champion tling ta chiah a. Mipa lamah Grand Slam a champion ngun ber Rafael Nadal record a tluk ta chiah. Grand Slam ah Djokovic leh Nadal aia champion ngun pahnih an la awm a, chungte chu hmeichhe player ropui pahnih; vawi 24 champion tawh Margaret Court leh vawi 23 champion tawh Serena Williams te an ni a. Djokovic leh Nadal te hian an chunga mite pahnih hi khum theihna hun tha tak an la nei. World No. 1 ni rei ber Djokovic hian Grand Slam a champion tam lamah Nadal a tluk rual hian, ATP Singtle title lak tam lamah Nadal hi title pakhatin a khum ta chiah thung.
Australian Open ah chak zawn rei ber record thar siamtu Novak Djokovic hian kum 2022 khan Australian Open ah tel phalsak a nih loh vangin hun hreawm tak a hmang a. Ausralia ah hian kum thum chhung zing thei lo tura hrem a ni tel bawk. Australia sorkar tharin an hremna hlihsak in, Australian Open 2023 hmachhawn phalsak a ni a, a ropuina mualah a ropui nawn leh ta a ni.