Aizawl Day 133-na hmang turin AMC a inpuahchah mek a; senso atan cheng nuai 60 dah a ni a.
He sum hmanna tur hi —football tournament, cleanliness competition, information and publicity, stall and exhibition, band contest, carnival, cultural leh souvenir and conclave te niin heng item hrang hrang atan hian sub-committee din vek a ni bawk.
-- Advertisement --
Tunhmain ‘Aizawl Mihlun’ tlemte ten Aizawl Day hi an lo hmang thin a, tun tumah hian anmahnia hman mai duhtawk loin mi zawng zawngin an hman theih na’n AMC an ngen niin AMC thuneitute chuan an sawi a. Aizawl khawpui inrelbawlnaa mawhphurtu ‘khawpui sawrkar AMC’ a awm tawh a, Aizawl Day lawmna AMC-in a huaihawt hi thil nihphung tur tak pawh a ni zawk awm e.
Khawpui din champha ‘Aizawl Day’ lawm dan turah hian, tuna ruahmannate hi thil tha tak tak vek a ni a; chutih rual erawh chuan, a huau huau lamah ringawt hian kan inhmang liam mai mai ang tih erawh a hlauhawm hle.
Khawpuia chengten khawpui hmasawnna hna thawhna atana sum (property tax) an thawh khawm atanga ‘za zela 80 hi khawpui hmasawnna atana hman tangkai tur’ tih a ni a. Hei hi Aizawl khawpui pawh hian a changkan phah mek a, khawpui hmelhmang pawh a tha zawngin a danglam chak hle a nih hi.
Hetianga Aizawl Day lawmna hi AMC kuta a awm chho zel dawn a nih chuan, intihhlimna leh a huau huau lam chauha inhmang lo hian, Aizawl Day lawmna denchhena khawpuiin hmasawnna ruhrel lian infrastructure liantham, Aizawl Day hming chuanna tur hi kum tin khawpui asset tling tham tur law law hi ngaihtuah chhuah theih ni se, insenso rau rauah, khawpuiin a kum telin hmasawnna liantham deuh a neih phah thin dawn tihna a ni a. Aizawl Day lawmna denchena ‘khawpui asset’ siamna tur atan hian alo berah cheng nuai zanga vel tal kan hman kum tin theih chuan, khawpui hian nasa takin hma a sawn phah ngei ang.