Djokovic-a’n Rafael Nadal a tlan pel

Roland Garros-ah French Open 2023 khelh chhunzawm zel a ni a, mipa lama player ngaihven hlawh Novak Djokovic leh Carlo Alcaraz ten hnehna changin quarter-final an lut. Grand Slam-ah vawi 22 champion tawh Novak Djokovic chuan French Open-a quarter-final luh tam lamah Nadal record a khum.
Champion tura rinkai pathumna Djokovic hian last 16-ah Juan Pablo Varillas a hmachhawn a, harsatna lian tawk lovin a chak. Serbia hian set khatnaah game thum chauh hlohin set a la a. Set hnihna leh set thumnaah game hnih ve ve chiah hloh chungin set a la zui leh a, 6-3 6-2 6-2 a hnehna changin quarter-final a lut. French Open-ah vawi hnih champion tawh Djokovic hian a vawi 17-nan French Open quarter-final a lut a, French Open-ah vawi 14 zet champion tawh Rafael Nadal aiin quarter-final a lut tam ta chiah a, Nadal a tlanpel. Inelna kal mekah hian a champion thei a nih chuan Nadal tlanpelin mipa lamah Grand Slam-a champion ngun ber a ni dawn bawk.
Quarter-final-a Karen Khachanov hmachhawn tur Djokovic hian Grand Slam quarter-final vawi 55 a lut tling chiah a, Grand Slam-ah quarter-final lut tam ber dawttu niin a chungah Grand Slam-a quarter-final vawi 58 lut tawh Roger Federer a awm. Djokovic hi Grand Slam a hmachhawn tawh zawng zawng match 344-ah vawi 47 a tlawm tawh a, a chak zat hi 87.98% a ni a, Grand Slam-a record neih that lamah Nadal a tlan pel bawkin, pahnihna a ni a. Djokovic chungah hian Grand Slam vawi 141 a hmachhawn atanga vawi 17 tlawm Bjorn Borg a awm a, ani chak zat hi 89.24% a ni.
Quarter-final-a inhmachhawn tur Djo-kovic leh Karen Khacha-nov te hi vawi kua an inhmachhawn tawh a, Djokovic hi vawi riat chak zawkah tangin, vawi khat chiah tlawm zawkah a tang. Khan-chanov a hneh a, Alcaraz-a’n Tsitsipas a hneh bawk chuan Djo-kovic leh Alcaraz hi semi-final-ah an inhma-chhawn dawn a, an ni inhmachhawn tur hi final aia hmuhnawm zawk tura ngaih a ni.
Djokovic chak hnu lawk hian champion tura rinkai ber Carlos Alcaraz chuan Lorenzo Musetti a hmachhawn a, harsatna lian tawk lova hnehna changin quarter-final a lut ve bawk. 17th seed Musetti hian World No.1 lakah beiseiawm takin bul a tan a, set khatnaah break nei nghalin, 2-0 in hmahruai mah se Clay a che tha thei tak Alcaraz er let a tuar lova, set khatnaah hian game khat bak a lak belh thei lo. Set hnihna leh set thumnaah pawh Alcaraz hi chungnung zawk a ni vek a, 6-3 6-2 6-2 a hnehna changin quarter-final a lut a, Stefanos Tsitsipas a hmachhawn zui leh ang.
Champion tura rinkai ber Alacaraz hmaa ding tur Tsitsipas hian fourth round-a a khingpui Austrian qualifier Sebastian Ofner chu 7-5 6-3 6-0 a hnehin quarter-final a lut. Quarter-final-ah hian vawi a hmachhawn tawha a la hneh miah loh Alcaraz lakah fiahna hautak a hmachhawn dawn a. Inlehthalna lian thlentirin a vawi khat nan Alcaraz hneh ngei a tum ang. Tsitsipas leh Alcaraz hi zanin hian an inkhel ang, Djokovic leh Khachanov te an inhmachhawn ve bawk ang.