Djokovic-a’n ro a rel chhunzawm ang – Andy Murray

Tennis a player hriat hlawh ni thin, Grand Slam-a vawi thum champion tawh leh World No. 1 pawh lo ni tawh Andy Murray chuan a elpui lian ni thin Novak Djokovic a la dah sang hle a. Serbian pa huaisen Djokovic hian kum hnih khat chhung chu Tennis a awpbeh zui theih a rinthu a sawi.
Novak Djokovic hian thawhtan zing khan US Open final-ah Daniil Medvedev chu set thum la zawnin a hneh a, Grand Slam-ah vawi 24 nan a champion. Mipa lamah Grand Slam-a champion ngun ber ni mek Djokovic hian hmeichhe lama champion ngun ber Margaret Court champion zat a tluk tel bawk. US Open-ah a champion vangin Djokovic boruak a lian thar leh zual a, a chungchang hi Tennis ngainatute titi tui ber a ni a ni rih. Mi tam takin Djokovic fakna thu an chhakchhuah sup sup laiin a kum rualpui leh a elpui lian ni thin Andy Murray pawhin Djokovic fakna thu a rawn chhakchhuak zui ve zat a. World No. 1 hlui Murray hian Djokovic rorelna titawp thei khawpa thiamna sang nei an awm loh thu a sawi hial.
Murray chuan, “Wimbledon final-ah Alcaraz laka a tlawm hnu khan Tennis-ah roreltu thar awmin, Djokovic-a rorelna a tihtawpsak niin an sawi hlawm a. Kei chuan he ngaihdan hi ka tawmpui ve lo. Final-ah khan an inhnehtawk em em a, an inthlau tam lo hle. Alcaraz hun a thleng a, a champion ta ni maiah ka ngai. Cincinatti Open leh US Open a zawh hnuin he ka ngaihdan hi a dikzia nemnghehin a awm”, a ti a.
Sawi chhunzawmin, “Nole hian kum hnih khat chhung chu Tennis hi a la awpbet thei ang. |hangthar player tha tak tak awm bawk mah se ani lehpel tur meuha thiamna sang, ril leh tlo nei an awmin ka hre lo. US Open-a a champion hi Grand Slam-a a champion tawpna a ni hauh lo ang”, a ti bawk.
Andy Murray leh Djokovic te hi kum inrual, Tennis-a an lar chhuah hun pawh inrual an ni a. Inelna hrang hrangah an inel tawk viau thin. Murray hian a elpui lian Djokovic hi Wim-bledon 2013 final , 2012 US Open final bakah ATP Finals 2016-ahte a lo hneh hial tawh. Hliam in a tihbuai nasat hnuin a tla hniam a, Djokovic el phak khawpin a thochhuak zo ta lo a nih chauh zawk. Hliamin tibuai nasa viau lo se Tennis-ah ‘Big Three’ ni lovin, ‘Big Four’ a pian hial theih hial a rinawm. Murray leh Djokovic te hi inelna hrang hrangah vawi 36 zet an inhmachhawn tawh a, Djokovic hi 25-11 in chungnung zawkah a tang mek. Vawi 36 zet inhmachhawn tawh an nih vangin an inhre chiang dun em em a. Rawlthar tha tak takten Djokovic an la el phak lo nia Murray-a’n a hriat thu a sawi pawh hi Djokovic thatzia hrechiangtu a nih miau vangin a pawmawm hle.
US Open 2023 final khelh a nih hma khan Daniil Medvedev chu Djokovic a hneh nawn leh theih a inring em tih zawh a ni a. Medvedev chuan, “ani hi chu mi danglam bik a ni a, a tlawm nawn duh ngai lo. A inzir chak em em a, a tluk tawhnaah a tlu nawn duh ngai tlat lo. Hneh chu ka duh ngei alawm, mah se..a harsa hle dawn”, tiin a hneh tak loh Djokovic chung-changa a lo sawi ve bawk.
US Open 2021 final-ah Mevedev hian Djokovic hi che hleithei lova siam in, a lo sawp tawh. US Open-a a sawp dan enin Medvedev hian Djokovic a hneh nawn fo a rinawm viau. Mah se, US Open 2021 hnu lamah Medvedev hi Djokovic lakah a chak leh ta miah lo teh tlat. Madrid Open-ah Carlos Alcaraz a vung em em a, Nadal a hneh hnuin Djokovic a hneh zui leh zat. Madrid Open-ah hneh viau mah se French Open semi-final-ah a ngam lo zui leh ta viau. Alcaraz hian vanneih-thlak ang reng takin Wimbledon final-ah hneh leh bawk mah se Cincinatti final-ah a hneh lo zui leh mai a. Djokovic hian Alcaraz a khel thiam ta viau nghe nghe. Hengte hi Djokovic danglam na leh mi bik a nihna a ni.