Djokovic lakah Sinner a chak ve ta

Turin khawpuia ATP Finals 2023 khelh mekah Italian Jannik Sinner a khel Tha tluang a, vawi hnih a chak zawnna ni turin Sinner hian a la hneh ngai loh Novak Djokovic chu thawhleh zan khan a hneh. Djokovic laka Sinner a chak nawlh lai hian Stefanos Tsitsipas chuan hliam vangin inelna a hmachhawn zui thei lo thung.
World No. 4 Jannik Sinner hian vawi thum a hmachhawn tawha a la hneh loh vek Djokovic lakah bul a Tan Tha a. Set khatna game inbuk tawk takah break a neih a chhawr Tangkai a, game nga hloh chungin zet hma sa a la. Harsa taka set khatna a lak hnuin Sinner hi set hnihnaah pawh a khel Tha zui viau a, game an inlak chhawk zak zak hnuin tie-break khelh a ngai. Tie-break-ah Djokovic a chungnung ve ta thung a, set khat ve ve lain, an inhnehtawk ve leh ta chiah.
Set khat ve ve an lak hnuin deciding set-ah an inbei zui leh chiam a, break nei a, set la thei an awm loh vangin tie-break khelh a ngai zui leh. Set pawimawh taka tie-break-ah mak tak maiin Sinner a chungnung ta viau thung a, point nga ngawta sang fal chungin set a la nawn leh a. Darkar thum chuang zet chhunga inkhel hmuhnawm leh harsa takah Jannik Sinner chu a khingpui Novak Djokovic chu 7-5, 6-7 (5-7) 7-6 (7-2) in a hneh a, an ram leilungah ngei hun chhinchhiahtlak a tawng.
Djokovic hnehtu Sinners hian a khelh hmasak berah Stefanos Tsitsipas a lo hneh tawh a, vawi hnih chak zawnin Green Group lamah hma a hruai mek. Group game hnuhnung berah Tsitsipas lakah khel hah lutuk lova hnehna chang Holger Rune a hmachhawn leh dawn a. Denmark rawlthar Rune lakah a chak thei a nih chuan Green Group a leader ni chungin semi-final a lut ang. Sinner hian Djokovic laka hnehna chan chu thil chhinchhiahtlak, a hun tawn ropui zing a mi a nih thu a sawi a.
Jannik Sinner laka tlawm a, Wimbledon final-a a chak loh hnua a chak loh lehna hmasa ber hun Tha lo tawngtu Djokovic hian group match hnuhnung berah Tsitsipas hmunruak luahtu Polish ninth seed Hubert Hurkacz a hmachhawn zui leh dawn a, semi-final luh theihna hun Tha a la nei ve bawk.
Nilai zan khan Green Group aTangin an khelh hmasaka tlawm tawh ve ve Holger Rune leh Stefanos Tsitsipas te an inhmachhawn a. Greek tlangval Tsitsipas hian hnufual zawk a nih laiin hliam a nei a, Doctor thurawn angin a inlan chhunzawm thei lova, ATP Finals aTangin a inhnukdawk. Hliam vanga inlan zui thei lo Tsitsipas hmunruak hi Hubert Hurkacz-a’n a hnawhkhat zui nghal.
ATP Finals 2023 ah player ngaihven hlawh Carlos Alcaraz chuan bul a Tan Tha lova, a khelh hmasak he inelnaa vawi hnih champion tawh Alexander Zverev hneh lovin a tlawm nghal ringawt a, hmabak hautak zawk a neih phah. Red Group a game hmasaah Daniil Medvedev chuan a hnampui Andrey Rublev chu set hloh lovin a sawp ve bawk.
Wimbledon 2023 ah Novak Djokovic hneha a champion vangin kum 20 mi Carlos Alcaraz-a’n ngaihven a hlawh thar hluai a, a Thatna leh a ropuina in sawizui a hlawh hle. Wimbledon hnu lamah erawh beisei angin a khel Tha thei lo ta thung a, champion na a la nei leh rih lo.