Doctor pawngsual leh thattu hrem dawn ta

India-a court chuan ram pum huapa mipui thinrimna thlentu, doctor zirlai pawngsual leh thattu chu hrem turin a ti ta.
Damdawi ina thawk, Sanjay Roy-a hi nikum August thlaa West Bengal khawpui, Kolkata-a a thawhna damdawi ina thil thlengah hian thiam loh chantir a ni.
He pawikhawihna hian ram pum nghawrin lungawi lohna leh damdawi ina thawk, a bikin hmeichhiate himna tha tawk lo avanga sorkar leh thuneitute nawrna a nasat phah hle.
Judge Anirban Das chuan hremna hi Thawhtannia puan tur Inrinni khan a ti a, hremna hi dam chhungin lung tan atana thi tura tih thlengin a ni thei a. Roy-a hian engmah tihsual a neih loh thu a la sawi reng a, tuten emaw an phiar mai niin a sawi.
Pawngsual tawk nu chuan Roy-a hian thihna a pumpelh a nih chuan mipuiin India-a dan rorelnaah an rinna an nghah ngam loh phah vek dawn thu AFP news agency chuan a sawi.
Doctor kum 31 mi hi August 9, 2024 khan sorkar damdawi in lun tak, Kolkata-a RG Kar Medical College & Hospital-ah a ruang chhar a ni.
Darkar 36 zet a duty hnuah damdawi ina seminar hall-ah a mu a. A taksa ruak deuhthaw, nasa taka inhliam chu a thawhpuiten podium bulah an chhar a ni.
Post-mortem examination atang chuan phuar beh a ni a, a hliam atangin nasa takin a bei let tih hmuh a ni.
Central Bureau of Investigation (CBI)-in an chhuinaa an thil hmuh an thehluhah chuan Roy-a hi rui chungin damdawi inah hian a kal a, doctor hmeichhia amah chauhva awm hi a hmu ta niin an tar lang.
A tukah amah pawh man zui nghal a ni.
A tirah he thil thleng hi Kolkata police-in an chhui phawt a, a hnuah state thuneitute chu thubuai an chhuinaah an titha tawk lo nia sawi a awm avangin court chuan CBI chhui turin a ti leh.
Thil thlen hnu chawlhkar eng emaw zat chhung chu doctor leh damdawi zirlaiten India ram hmun hrang hrangah lungawi lohna leh dikna hlen chhuah duhna an aupui a, doctor-te tana himna an aupui bawk.
Lungawi lohna lantir lian ber pakhat chu India-in zalenna a neih champha lawmna ni hma zan, August 14 khan neih niin ‘Reclaim the Night’ kawng zawh tih a ni a. Mi sing chuang Kolkata leh khawpui lian dangah an pungkhawm a ni.
December thla khan a tuartu nu leh pa hian Calcutta High Court-ah chhui that leh ngenna an thehlut a, CBI-in an chhuinaah an lungawi tawk lo.
Roy-a hian amah chauhvin hetiang pawi hi a khawih thei lo niin an ngai a, a inhnamhnawih dang zawng zawngte lakah dikna hlen chhuah an duh thu an thlen a. High court erawh chuan an thu thlen hi he thubuai viltu, Supreme Court-in ti tura a tih chauhvin tih theih a ni tih a sawi thung.
He thil thleng avang hian India-a damdawi ina thawkte chunga tharum thawhna thleng a tam thin chu sawi rik rin a nih phah a. Thawktu tam tak hi damlo leh an chhungte thinrimin kut an thlak fo tih sawi a ni.
Kum 2017-a Indian Medical Association (IMA)-in zirchianna a neihah chuan India-a doctor 75% chuang chuan eng emaw kawng zawng taka tharum thawhna an tawrh thu an tar lang a. Doctor 63% dawnin an damlo enkawlte lak atanga tharum thawhna an tawrh mai an hlau thu an sawi bawk.
Hetih lai hian India-ah hian mipat hmeichhiatna kawnga hmeichhiate laka tharum thawhna hi a hluar hle a. National Crime Records Bureau (NCRB)-in a chhinchhiah dan chuan kum 2022 khan mi 31,000 chuang pawngsual an ni.
India-a pawngsualna thleng tam tak hi police leh dan rorelna rintawk loh vang te, mi hmuhsit tawh hlauh vang leh a titu hlauhna avangin thuneitute hnena thlen a ni lo va. Hetiang lama hma latute chuan thup a nih fo avang hian pawikhawihna a tam phah niin an sawi bawk.
Kum 2012 khan India khawpui ber, Delhi-ah mipa rualin doctor zirlai hmeichhia chu pawngsual rawnin rawng takin an thah a, hemi tum phei hi chuan India mai ni lo, khawvel pumah demna a tam hle.
Mipui thinrim nawrna avangin thuneitute pawhin pawngsual hremna dan chu kum 2013 khan a ennawn phah ta a. Dan bawhchhiate chu na zawka hremna pek tura tih a nih tak bakah a titu puitlinga chhiar chin pawh kum 18 atangin 16-ah a tihniam bawk.