February 14-ah lo neitute leh sorkar inbe dawn

Sorkar laipui chuan Punjab-a lo neitu lungawi lote chu February 14 hian Chandigarh-ah an thil phutte a sawipui dawn ta a. Hei hian hun rei tak an lo nawr tawh, an thlaitharte hralhna man tlawm ber tur dan anga kalpui an phuta an nawrna a tihtawp theih beisei a ni.
Inbiak tur puan a nih mek lai hian lo neitu pawl hruaitu, Jagjit Singh Dallewal chu an thil phut a hlawhtlin theih nana ni 54 chaw a nghei hnuah Inrinni khan damdawi ina hruai a duh ve ta bawk.
Damdawi in kal hi duh mah se dan anga minimum support price (MSP) an neih hma chu chaw nghei a thulh dawn chuang lo niin an hruaitu, Sukhjit Singh Hardojhande chuan a sawi.
A hnuah Dallewal-a hi damdawi pek a ni lai thlalakte chu lo neitute hian an thehdarh zui.
Union agriculture ministry mi tirh, Joint Secretary Priya Ranjan-a kaihhruai chuan Dallewal-a hi an hmu a. Thla 11 zet nawrna an huaihawt tawha a bultumtu, Samyukta Kisan Morcha (non-political) leh Kisan Mazdoor Morcha (KMM) aiawhte an be bawk.
February 14-a inbiak tur puan a nih hnuah hian lo neitu hruaitute chuan Dallewal-a hi damdawi ina hruai turin an bia a, amah pawhin a duh ta a ni.
Sorkar laipui mi tirhte pawh hian Dallewal-a hi hmuin inbiakna an neih tura a tel ngei thei nan damdawi in kalpuiah an sawm bawk a. Inbiakna hi Chandigarh-a Mahatma Gandhi State Institute of Public Administration-ah tlar dar 5:00-ah neih turin an ti.
Khanauri-a nawrna an lantirna hmuna thuthar lakhawmtute a kawmnaah Ranjan-a chuan sorkar laipui aiawhte hian Dallewal-a hriselna an ngaih pawimawh thu a sawi.
“A dinhmun kan han en a, lo neitu pawl aiawhte nen kan inbe zui ta a ni,” a ti.
“Dallewal-a hi a chaw nghei titawpa damdawi in pan turin kan ngen a, chu chu inbiaknaa a tel theihna tur pawh a ni,” a ti.
SKM (non-political) leh KMM pawhin, “Sorkar nena inbiak zawhah hian February 15, 2024-ah SKM leh KMM hi Chandigarh-ah an thukhawm zui ang,” tiin thu an chhuah.
Lo neitute leh sorkar laipui hi nikum chhung khan vawi li – February 8, 12, 15 leh 18-ah an lo inbe tawh a, inremna tha tawk an nei thei lo.
Inrinni chawhma lamah khan Punjab leh Haryana ramri, Khanauri leh Shambhu-a nawrna an huaihawtna hmuna lo neitute chuan sorkar laipui atanga inbe tura dawrna an dawn thu an sawi.
Inrinnia an inbiaknaah hian Punjab sorkar aiawhin additional director general of police hlui, Jaskaran Singh leh deputy inspector general of police hlui, Narinder Bhargav te pawh an tel.
Lo neitu hruaitu, Abhimanyu Kohar chuan thuneitute hian February 14 hi Delhi-a assembly inthlan avangin ruat tih a sawi a. “Delhi-ah hian Model Code of Conduct chu February 9 thleng hman tur a ni a, hetih chhung hian sorkarin engmah a ti thei lo a ni,” a ti.
Dallewal-a hi tui a in thei lo va, a luak bawk tih Kohar-a chuan a sawi a. Doctor-te chuan a chungah hian engpawh thleng thei tih an sawi niin a sawi bawk.
Damdawi in pan a remtih hma hian Dallewal-a hian lo neitu chaw nghei ve mek dang 121-te thu rawn a la hmasa a. Ni rei vak lo liam taah khan lo neitu 111 leh a hnua belhtu 10-te chuan Dallewal-a thlawp nan chaw nghei hi an kalpui ve tan a ni.
Dallewal-a hi SKM (non-political) convenor niin Khanauri-ah hian November 26 atang khan thil phut hrang hrang nawr nan chaw a nghei tan.
Lo neitute chuan November 26 atang khan Dallewal-a hian engmah a la ei lo va, tui chauh a in tih an sawi.
Chaw a nghei atangin kg 20 zet a rihna a hloh tawh a. Kg 86.9 ni thin kha kg 66.4 chauh a ni tawh.
Lo neitute hi SKM (non-political) leh KMM hming puin February 13 atang khan Shambhu leh Khanauri ramri-ah an inhawr khawm tan a, venhim hna thawktuten Delhi thlenga kawng an zawh tur chu kaltlang an phal lo a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More