DOCTORS

K. Hmingthankaia
Kum 30 ka nih vel thleng khan, ‘Doctor leh damdawi tih vel hi eng atan mah ka ti lo. Ka mamawh lo’ te kha ka’n ti ve pang pang thin a. Ka zu in nasa lutuk leh mei ka zu nasa lutuk ka’n TB chiah mai chu le.. Doctor leh damdawi lam chu ka lo mamawh tehmeuh mai le!! Dr. Pu Tlangkunga’n, “En teh, i chuap thalai tlemzia hi” a’n ti mai chu.. Mihring taksa hi chhe thei, na thei, damlo thei leh thi thei a lo nihzia chu ka chiang ve ta em em a ni. Ruih pawr lai leh na hriat loh laia (na chhawkna zu in laia) kan lo intih pa vel chhung khan, mahni thlan khur ko tlangah tla lut lek lekin kan lo ding reng tawh chu niin.
Pu Tlangkunga kha ka ngai thin khawp mai. Doctor ka pan hmasak ber a ni a. Mizo zinga doctor thiam kan neih hmasak pawl a ni a. Keimah mi enkawl hma khan mihring engzat tak lo enkawl tawh ang maw. Mahse, keimah chauh kha damlo a la enkawl chhun niawm tak khan, duat tak leh tih takzet na nen, uluk tak leh zaidam takin, hmangaihna tak tak nen nelawm tak khan min enkawl a. Ka va ngai thin tak em. Damdawi mai piah lamah, amah kha ka dampui ni berin ka hre thin. Mual min liamsan ta mai hi a pawi ngawt mai.
Pu Tlangkunga vang khan doctor pan hi ka zawngchhang phah a ni. Tunhmaa ka zu rui pawrin, doctor ka mamawh lo, lo ti pang pang thin khan, engemaw hlekah ka taksa awm dan hi ka ngaichang vung vunga, doctor ka pan leh ngawt thin. Keima rualpui-ah chuan doctor leh damdawi lam pan nasa pawl tak ka ni tawh hial ang.
Tunlai doctor-ho zinga Pu Tlangkunga ang ka tih ber leh ka tehkhin fo chu, Mizopa em em mai, Pu Zothansanga, Aizawl Civil Hospitala Medicine Head of Department hi a ni. Tu pawh hi a thian kawmngeih ber ang hian min en thei vek a ni. A Mizopa si, a nelawm si, a bulah inthlahrunna tur a awm miah lo, a inhawng em em zel a ni. A dawt lehah chuan, Medicine ami tho Dr. Lalmuankimi (Dr.Mki) hi a ni. Ani pawh hi vawikhat ka rawnna atangin kum tam tak inkawm tawh ang maiin kan innel nghal em em mai a ni. Engkimah hian mihring rilru chu pawn lamah hian a lo lang chhuak thin si a. Doctor dang fel leh tha tak tak pawh an awm teuh ang. Ka belhchian loh vang leh, heng, an hming ka sawite hi ka belhchian deuh vang pawh a ni thei bawk. Chutih rualin, doctor thenkhat leh, doctor chiah lo pawh ka thin tiur fe fe chu ka tawng ve fo tho bawk.
Doctor ho zingah hian, Pathianin doctor ni tur renga a duan leh pianpui hrim hrim niawm tak an awm laiin, doctor nih inhmeh miah lo, doctor tur ni miah lo, eng eizawnna dang emaw thawk zawk awm tak, sumdawng phakar deuh tur niawmte, zirtirtu sual deuh niawmte, engineer zu heh deuh tur niawm tak takte an lo awm ve bawk tho a ni. Chu’ng mite chu mipuiin kan hai lo. Loh theih loh avangin kan pan lo thei lo thin a ni zawk. Hei hi ka sawi leh ang- Mihring zawng zawng hi kan ka leh mit leh beng hmanga kan indawr hma hian, kan chhunglam thlarau hi an lo inhmu hmasain, an lo indawr daih tawh thin, tih hi ka Philosophy a ni e. Chuvangin, kan chhungril lam rilru hi kan hmel leh tawngkam leh, kan thil tih leh kan chetvel danah hian fiah takin a lang vek a. Chu chu miten an lo chhiar thiam vek thin bawk a ni, tih hi i theihnghilh lo ang u.
Doctor-te ka ngaihsan em emna chu- Mi tu pawh angkhat veka an en thei hi a ni. Michhe bakberh berte, hmel chhe lutuk leh piangsualte leh, vun rawng hrang hrang chi tin hnamtinte hi, an vawikhat damlo enna ang maiin an uluk em em zel thei te hi an va ropui em! Nin leh chauh pawh nei lo hian ni tin nileng leng hian damlo tan thahnem an ngai em em thei zel mai hi a va mak em! Chutiang bawkin, milian leh challang, mihausa leh milarte pawh an nihna anga en hauh lovin, an natna zawnah chiah midang ang thoin pangngai takin an en mai a, an danglam chhete lo. Milian leh mi pawimawh leh milar an en lai ka hmu fo tawh. An danglam ngai lo. Doctor-te ka ngaisang a che u.
A tawp berah chuan sawrkar ka ngen duh chu hei hi a ni. Mipui leh Department pawhin doctor tha lo leh biak nuam lo an tihte hi, hremna angrengin thingtlangah sawn ngawt thin suh u. Thingtlangah chuan an inluling sauh anga, thingtlang unaute an khawngaihthlak lutuk ang. Aizawlah chuan sawisel ngam leh ziak ngam leh hau ngam an awm deuh a. Tin, tlanchhiatna tur doctor dang an tam deuh bawk a. Thil danga hrem dan a ngaihtuah theih tho ang.
A theih hram chuan thingtlang lamah hian doctor fel leh thate hi awm zawk thin se, kan ziaawm tlang zawk ngei anga, mahse, Aizawl pawh hian doctor tha chu kan ui ve tho si a nih hi.