38th National Games-ah Mizote tan gold a hmin ta!

38th National Games-ah Mizote tan gold a hmin ta!
Ningani khan Mizote tana gold medal beiseina tlemte zinga pakhat taekwondo poomsae inelna hmasa ber mens individual poomsae (lam) khelh tan niin, Lalthlamuanpuia’n a tumpui zawng zawng hneh vek chungin Uttarakhand-a 38th National Games kal laiah Mizoram tana gold medal hmasaber a hlawhchhuak.
Gold medal a lakna kawngah Mizo tlangval hian round tinah a chungnunna a ti lang chho a; knock out round luhna tura inthlitfimna leh seeded zawnna pre quarter round-ah point 7.916 hmuin, point hmu sang ber a ni a, seeded number one a nih phah.
Knock out round hmasa ber quarter final-ah Arunachal Pradesh player seeded 8 Akas Kumar nen intumin, Akas-a’n point 7.633 a hmuh laiin Thlamuanpuia’n point 7.998 hmuin hnehna a chang.
Semi-final lamah Gujarat aiawh Pajapat Rotak hmachhawn lehin, 1st poomsae inelnaah Thlamuana hi chungnung zawk mah se 2nd poomsae-ah Gujarat pa hian a rawn lehthal thung a, mahse, 1st leh 2nd inelna chawhruala an point hmuh ve ve hi 8.132 leh 8.116 niin, 0.016 leka inthlauin Mizo player-in hnehna hlu tak a chang zui ta a ni.
Final-ah hian National Games hnuhnung ber Goa-a gold medal awrhtu Services Sports Control Board (SSCB) chhuanvawr Dingku Singh ngei mai a hmachhawn a!
Boruak tang tak karah Thlamuanpuia hian accuracy leh presentation point hmuh theihna zawng zawnga a chungnun zawkzia a tilang vek thei a, point 8.199 hmuin, champion lai Dingku hian point 7.999 a hmu thung a, Venghlui tlangval Thlamuanpuia kutah kumin chu National Games gold medal a lut ta zawk a ni.
Nimin khan taekwondo an awl a, vawiin hian poomsae mipa team leh hmeichhe team inelnaah Mizoram an inlan ang a, kyorugi (fight) under 63 kg huangah Samuel Lalnunmawia a chechhuak bawk ang.
Athletics lamah Vanlalthleipuii Chhangte leh Leijakai Lenthangte’n Dehradunah 100 meter heat an tlan dawn bawk a ni.
Tukin zing dar 8.45 atang hian hmeichhe hockey lamah Mizoram leh Uttarakhand an intum dawn bawk a nih kha.