Doja Cat ‘Paint the Town Red’ a lar ber

Doja Cat hla hit ‘Paint the Town Red’ chu kar khat chhunga khawvel huapa hla lar ber niin, Billboard Global 200 chart-ah a No.1, he chart-a kumina rap hla No.1 ni thei hmasa ber a ni a, Doja Cat tan pawh a hla he chart-a No.1 kai thei hmasa ber a ni bawk.
Billboard Global 200 chart hi kar khat chhunga khawvel huapa hla lar dan tehna niin, chart ranking siam nan hian ram hrang hrang 200 chuanga official-only stream (subscription leh ad-supported audio leh video music services) leh download sales te chu tehna pawimawh a ni.
Doja Cat ‘Paint the Town Red’ hi stream maktaduai 84 leh sales 12,000 tlingin chart No.2 atangin No.1 a kai ta a, he chart-a a hla No.1 kai thei hmasa ber nih bakah November 2022-a Drake leh 21 Savage ‘Rich Flex’ hnua he chart-a rap hla No.1 ni leh thei hmasa ber a ni bawk.
Jung Kook ‘Seven’ featuring Latto chu kar sarih a No.1 hnuah No.2-ah a tawlh ve ta a, Taylor Swift ‘Cruel Summer’ chu No.3-ah bawk la awmin, Myke Towers ‘Lala’ chu No.7 atangin No.4-ah a insawn thar leh a, Dua Lipa ‘Dance the Night’ chu No.5-ah bawk a la awm.
Billboard Global 200 Top 10:
1 Paint The Town Red – Doja Cat
2 Seven – Jung Kook Featuring Latto
3 Cruel Summer – Taylor Swift
4 LaLa – Myke Towers
5 Dance The Night – Dua Lipa
6 I Remember Everything – Zach Bryan Featuring Kacey Musgraves
7 Qlona – Karol G & Peso Pluma
8 What Was I Made For? – Billie Eilish
9 Fukumean – Gunna
10 Vampire – Olivia Rodrigo