Dortmund boss thar Kovac

Thla 18 chhung atan Bayern Munich manager hlui Niko Kovac chuan Borussia Dortmund-ah contract a ziak a, karliamta maia Bundesliga club-in an ban tak Nuri Sahin thlakin Dortmund-ah head coach hna a thawk zui ta a ni.
Borussia Dortmund hi karhmasa mai khan Nuri ho hian Bologna khelmual Champions League-ah tlawmin, kha kha inelna hrang hranga vawinga zet an chak loh zawnna a ni a, an manager lakah dawhtheihna an lantir zel thei ta bik lo a, kum 53-a upa Kovac senglut nghalin, kartawp Bundesliga match pakhata Heidenheim an hmachhawn hunah head coach thar hnuaia hmasawnna an beisei tan nghal dawn a ni.
Dortmund managing director Lars Ricken chuan ni rei vak lo inbiakna an kalpui hnuah duh takin Niko Kovac an senglut ta tih sawiin, tun dinhmunah an club-in sport zawnah chona lian an hmachhawn mek tih a sawi a, Niko chu an beisei innghahna a nih thu a tarlang tel.
Kovac pawhin an indawrna boruak atanga a hmuh danin an thawhhona kal zel chuan hmalam hunah hlawhtlinna an sualchhuak thei tih a hmu tlang ruak niin a sawi ve bawk!
Head coach thar atana Kovac an sengluh hma lawk hian Dortmund hian Champions League play-off khel turin an dinhmun an sawhnghet hram a ni.
German-ho hian league phase round hnuhnungberah khan 3-1-a Shakhtar Donetsk hnehin table-ah 10-na an luah a, automatic-a last 16 lut pha chin bawrkhawmna a sang zual pariat zingah tel pha lo mah se play-off khel turin an tling zui ta tho a, Belgian club Club Brugge nen play-off lamah an intum ang.
Kovac-a team thar Borussia Dortmund hi tun season-a league game 19 an khelh tawhah vawisarih chauh la chakin, German top flight table-ah 11-na an ni mek a, point 22 zetin hmahruaitu Bayern Munich an pha lo mek.