Dragon fruit juice siam tintuah

Champhai leh Hnahlan lamah grape chin leh a wine siam chu eizawnna ngelnghet a nih chhoh mek tawh laiin, Kolasib lamah dragonfruit tui sawr lam tintuah ve mek a ni.
“Dragonfruit hi chhungkaw tam takin inah kan ei khawp kan nei fur tawh a, huan siama a hmun neitu kuthnthawktuten a hralhna lam an manganpui leh thin. Thenawm state-ah te a market kan zawng a, hralhchhuak tam turin quality tha a lo ngai leh a, hmun dang ami quality tha an lakluh tel tho bakah kan ram thei thar hi a quality tha a tlem zawk a, processing lam hawi a ngai a ni,” tiin dragon fruit juice siam turin ngaihtuahna an seng chho tan ta tih a buaipuitu zing ami R Lalhmingthanga chuan The Aizawl Post a hrilh.
Kolasib district-a dragonfruit leh thei dang (fresh fruit) state pawnah leh tualchhungah man man zawka hralh tumin, association indin meuhin a rate an khuahkhirh tih a sawi a. Mimal emaw sumdawng dang emaw pawhin la duh se, association rate bituk, Kg ah Rs.150-a an lak ngei theih nan an khuahkhirh a. Thui zawnga hma la zel turin association anga kal zel rem loh chin a lo awm a, Kolasib Agro Marketing Cooperative (KAMCO) Society an din ta tih a sawi a ni.
Dragonfruit processing hian bul an tan a, fermented juice processing trial an nei chho a, tam tham zawka siam turin an puitlin thei dawn tih an chiang ta tih a sawi. FOCUS hnuaiah fund a dil theih tih hria in, project siamin DPR an thehlut ve leh a, pawmsak an nih hnu ah sum an sanction a, hemi hmang hian Uttar Pradesh atangin khawl an lei a, tun thla chhung hian buhn fel theih an inbeisei tih R Lalhmingthanga chuan a sawi.
“Dragonfruit ah hma kan la phawt anga, agriculture product dangah pawh society hian hma lak chhoh zel kan tum,” a ti a. Dragonfruit juice hi tuna an siamchhuah theih chin tura beiseiah demand a sang a, tualchhung pawh an la chawm zawh mai loh an rin laiin, state thenawm atang pawhin an rawn ngaihven hle tawh tih a sawi a ni.