Drake-a’n Hot 100 chart-ah Michael Jackson record a nihrual

Drake hla thar ‘First Person Shooter’ featuring J. Cole chu Billboard Hot 100 (singles) chart No.1-ah a debut a, Drake tan Hot 100 chart-a No.1 kai thei hla 13 a neihna niin, J.Cole tan a pakhatna a ni ve thung. Drake hian Michael Jackson record nih rualin, mipa solo artist zinga Hot 100 chart-a No.1 kai thei hla ngah ber a ni ve ta a ni.
Billboard Hot 100 chart hi kar khat chhunga US-a hla lar dan tehna niin, chart ranking siam nan hian all-genre US streaming (official audio leh official video), radio airplay leh sales data te chu tehna pawimawh a ni.
Drake ‘First Person Shooter’ featuring J. Cole hi Drake album thar, Billboard 200 (albums) chart No.1-a debut ‘For All the Dogs’ atanga a single a ni a, kar khat chhungin stream maktaduai 42.2 leh sales 4,000 tlingin, radio airplay-ah pawh ngaithlatu maktaduai 4.3 a nei pha a, hei hi Hot 100 chart No.1-ah a debut pui ta a ni.
Tihian Drake chu Michael Jackson nen mipa solo artist zinga Hot 100 chart-a No.1 kai thei hla ngah ber an ni ta a, Drake hian MJ hi lehpelin, amahin record thar a siam thei ngeiin a rinawm. Mipa solo artist chauh ni loah chuan Drake leh MJ te hi palina an ni a, Hot 100 chart-a No.1 kai thei hla ngah ber chu The Beatles niin, hla 20 No.1 kai thei an nei a, Mariah Carey (19), Rihanna (14), Drake & MJ (13), Madonna (12), The Supremes (12), WHitney Houston (11), Janest Jackson (10) leh Stevie Wonder (10) ten an dawt a ni.
Drake hla dang paruk, ‘For All the Dogs’ album amite chu chart top 10-ah langin, ‘IDGAF’ featuring Yeat chu No.2 niin, ‘Virginia Beach’ chu No.3 a ni a, ‘Calling for You’ featuring 21 Savage chu No.5 niin, ‘Slime You Out’ featuring SZA chu No.6 a ni a, ‘Daylight’ chu No.8 niin, ‘Fear of Heights’ chu No.10 a ni bawk.
SZA ‘Snooze’ chu No.7 atangin No.2 a kai thar leh a, Taylor Swift ‘Cruel Summer’ chu No.3 atangin No.9-ah a tawlh ta bawk.