Drake-a’n No.1 album 13 a nei tling ta

Drake-a’n No.1 album 13 a nei tling ta
Drake album thar ‘For All the Dogs’ chu Billboard 200 (albums) chart No.1-ah a debut a, he chart-a a album No.1 kai thei 13-na a ni a, tun kum hnih pawh tling lo chhunga Drake album thar palina niin, June 2022 hnua a album tlangzarh pathumna a ni bawk. Drake hian album a tichhuak deuh mawlh mawlh mai a, 21 Savage nena an album intawm ‘Her Loss’ chu November 2022 khan tlangzarhin, June 2022-ah a solo album ‘Honestly’ leh September 2021-ah ‘Certified Lover Boy’ a tlangzarh tawh bawk.
Billboard 200 chart hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna bakah streaming atanga album hralhna tlukpui leh album-a hla mal hralhna atanga album tlukpui te belhkhawm thin a ni.
Drake album thar ‘For All the Dogs’ hi October ni 6 khan tlangzarhin, October ni 12 thlengin US-ah 4,02,000 an hralh hman a, chung zinga 3,91,000 chu streaming atanga album hralhna tlukpui, on-demand official stream maktaduai 514.01 a ni a, album tak tak hralh zat chu 10,000 a ni a, album-a hla mal hralhna atangin 1,000 an tlin thei bawk. Drake album thar hi kumina album tlangzarh tawhah chuan kar khat chhunga stream nasat ber record a la ni.
Drake hian Billboard 200 chart-a No.1 kai thei album 13 a neih tlin takah chuan Taylor Swift kal sanin, he chart-a No.1 kai thei album ngahah amahin pathumna a ni ta a, No.1 album 19 nei thei The Beatles leh No.1 album 14 nei thei Jay Z te chiah a pha lo va, No.1 album 12 nei thei Taylor Swift chu Drake dawttu niin, 4-na a ni. Taylor Swift hian a re-recorded project ‘1989 (Taylor’s Version)’ chu October ni 27-ah a tlangzarh dawn a, he album hi No.1 kai ngei tura rinkaiin, Drake hi a um pha ve leh mai chuan a rinawm.
Billboard 200 chart No.2 atanga No.7 thleng chu chart No.1 hlui vek an ni a, Morgan Wallen ‘One Thing at a Time’ chu 72,000 hralh lehin No.1 atangin No.2-ah a tawlh a, Rod Wave ‘Nostalgia’ chu 59,000 hralh lehin No.2 atangin No.3-ah a tawlh a, Olivia Rodrigo ‘Guts’ chu 59,000 tling lo deuh hralhin No.3 atangin No.4-ah a tawlh a, Zach Bryan self-titled album chu 53,000 hralh lehin No.5-ah bawk a la awm a, SZA ‘SOS’ chu 50,000 hralh lehin No.6 a la ni a, Taylor Swift ‘Midnights’ chu 42,000 hralh lehin No.8 atangin No.7-ah a insawn thar leh hret a, Travis Scott ‘Utopia’ chu 40,000 hralh lehin No.7 atangin No.8-ah a tawlh ta bawk.
Noah Kahan ‘Stick Season’ pawh top 10-ah a rawn lang leh ta a, 39,000 aia tam deuh hralh lehin No.13 atangin No.9-ah a invawrh a, chart No.1 hlui Taylor Swift ‘Lover’ chu 39,000 hralh lehin No.11 atangin No.10 a kai thar ve leh ta baw