Drake & Yeat ‘IDGAF’ a lar ber

Drake & Yeat ‘IDGAF’ a lar ber
Drake hla thar ‘IDGAF’ featuring Yeat chu Billboard Global 200 chart No.1-ah a debut a, Drake tan he chart-a a hla No.1 kai thei pathumna niin, Yeat tan a vawi khatna a ni ve thung. He hla hi Drake album thar ‘For All the Dogs’ atanga a single niin, he album-a hla panga chu Billboard Global 200 chart top 10-ah an lang thei a ni. Hetihrual hian Jennie ‘You & Me’ pawh top 10-ah a lang e.
Billboard Global 200 chart hi kar khat chhunga khawvel huapa hla lar dan tehna niin, chart ranking siam nan hian ram hrang hrang 200 chuanga official-only streams (subscription leh ad-supported audio leh video music services) leh download sales te chu tehna pawimawh a ni.
Drake ‘IDGAF’ featuring Yeat hian kar khat chhungin stream maktaduai 65.5 leh download sales 2,000 a nei thei a, hei hi chart-ah a No.1 pui ta a ni. Drake hian 21 Savage a thawhpuina ;Rich Flex’ chu November 2022 khan he chart-ah hian No.1 a lo kaipui tawh a, March 2021-ah ‘What’s Next’ a lo No.1 pui tawh bawk. Tihian, Global 200 chart-a No.1 kai thei hla pathum a nei tling ta, soloist zinga he chart-a No.1 kai thei hla ngah ber Bad Bunny a nih rual ta chiah a, soloist chauh ni loah chuan BTS chiah phak loh a nei ta a, BTS hian Global 200 chart-a No.1 kai thei hla pasarih an nei tawh a ni.
Drake hla dang ‘First Person Shooter’ featuring J. Cole chu No.2 a ni a, he hla hi Billboard Hot 100 chart-ah a No.1 thung a, ‘Virginia Beach’ chu No.4 niin, ‘Calling for You’ featuring 21 Savage chu No.9 a ni a, ‘Gently’ featuring Bad Bunny chu No.10 a ni bawk.
Drake hian Global 200 chart top 10-a lang thei hla 35 a nei tling tawh a, he chart top 10-a lang thei hla ngah ber niin, amah hnaih bertu Taylor Swift-in hla 17 a nei pha chauh a ni. J. Cole pawhin chart top 10-a lang thei hla paruk nei tlingin, 21 Savage tan a 14-na a ni a, Bad Bunny tan a 16-na a ni ve thung.
Chart No.1 hlui Doja Cat ‘Paint the Town Red’ chu No.2 atangin No.3-ah a tawlh a, chart No.1 hlui bawk Jung Kook & Jack Harlow ‘3D’ chu No.1 atangin No.5-ah a tawlh ta bawk.
BLACKPINK member Jennie hla thar ‘You & Me’ chu stream maktaduai 65.1 tlingin No.7-ah a debut a, solo artist anga Jennie hla he chart top 10-a lang thei hmasa ber a ni a, tihian BLACKPINK member pali te chuan solo artist angin he chart top 10-a lang thei hla an nei ta vek a, BLACKPINK angin top 10-a lang thei hla pali an nei tawh bawk.
Billboard Global 200 Top 10:
1 IDGAF – Drake Featuring Yeat
2 First Person Shooter – Drake Featuring J. Cole
3 Paint The Town Red – Doja Cat
4 Virginia Beach – Drake
5 3D – Jung Kook & Jack Harlow
6 Greedy – Tate McRae
7 You & Me – Jennie
8 Seven – Jung Kook Featuring Latto
9 Calling For You – Drake Featuring 21 Savage
10 Gently – Drake Featuring Bad Bunny