Drone hmangin ram enfiah dawn

Drone hmangin ram enfiah dawn
Sawrkar laipui pilot project, “National Geospatial Knowledge-based Land Survey of Urban Habitations” (NAKSHA) hnuaia Aizawl chhimlama Municipal ward pakua (Ward XI – XIX) veng 43 huam drone hmanga survey tur chu Thawhlehni khan Land Revenue & Settlement minister B Lalchhanzova’n Mualpui Helipad-ah a vailiam.
Minister chuan NAKSHA project hi a hlawhtlin chuan in hmun lo/ram record vawn dan a tihchangtlun dawn bakah nasa takin hmasawnna a thlen dawn a. Property record leh khawpui planning-ah data tangkai tak an neih theih a beisei tih a sawi.
He project hnuaia data hmang hian ram buai leh enho ngai pawh dawhkanah chiang taka enho a theih tawh tur thu sawiin, hei hi kan ramin a mamawh tak a nih angin LR&S department pawhin an tangkaipui tur thu a sawi a ni.
Heng data hi Revenue department chuan a hmang tangkai duh department dang hnenah an hman chhawn tir thei dawn tih a sawi bawk.
LR&S director R Lalthazuala chuan Garuda UAV Pvt. Ltd-in drone changkang ber ber hmangin Aizawl khawpui an survey dawn tih a sawi a. Tehfung dik tak an hman theih dawn avangin data fiah felfai tak a awm dawn a, ramri buai chungchanga harsatna an tawh thin pawh chinfel a awlsam phah sawt beisei a ni tih a sawi.