HSSLC-ah kum hmasa aiin pass tha Stream thuma topper hmeichhia vek

On May 7, 2025 58 0

HSSLC-ah kum hmasa aiin pass tha
Stream thuma topper hmeichhia vek
Higher Secondary School Leaving Certificate (HSSLC) Examination 2025 result chu Thawhlehni khan Mizoram Board of School Education chuan a tichhuak a, zirlai exam hi kum 2024 aiin an pass tha. Stream pathuma topper chu hmeichhia vek an ni.
Science stream-ah Cynthia Lalhlupuii Shangpliang d/o Kyrshanbor SShangpliang, St Paul’s Higher Secondary School chuan mark 500-ah mark 477 hmuin pakhatna a ni a. Cynthia hi kum 2023 HSLC Exam-ah pakhatna alo ni tawh. Science-ah hian top 10-ah mi 15 an lang a; 2-na, 4-na leh 7-naah pahnih theuh leh 9-naah 3 an awm a. St. Paul’s HSS leh St. Joseph HSS zirlai vek an ni.
Commerce stream-ah Kristin Laldinpuii Ralte d/o Lalsangliana Ralte, Oikos HSS chuan mark 500-ah 470 hmuin pakhatna a ni a. Commerce-ah hian top 10-ah 10 chiah chiah langin, Oikos, St Joseph leh St. Paul’s zirlai an ni.
Arts stream-ah Lalrammawii Tochhong d/o Reubem Lalrinkima, Mt. Carmel School chuan mark 500-ah 471 hmuin pakhatna a ni a. Arts-ah hian top 10-ah 16 an lang a; 4-na, 5-na, 6-na, 7-na, 9-na leh 10-naah pahnih theuh an awm. Mount Carmel School bakah St. Paul’s, St. Joseph, Oikos leh Synod HSS zirlai an lang a ni.
Kumina heng stream pathuma zirlai exam zawng zawng hi 12105 an ni a, Arts-ah tam berin zirlai 8658, Science-ah 2798 leh Commerce-ah 649 an ni. Exam zawng zawng atangin 9817 an pass a; exam hmachhawn zat mipa aiin hmeichhia 1015-in an tam a, pass zat pawh hmeichhia 1035-in an tam zawk.
Exam zawng zawng atangin zaa 81.10 an pass a. 2024 HSSLC exam result pass percentage 78.04% niin, kumina a san zawkna hi 3.06% a ni.
Nikum khan zirlai exam 11824 awmin, 9227 (78.04%) in an pass a, kum 2024 hi kum 2023 pass percentage 78.66% leh 2022 pass percentage 82.07 ai pawhin a hniam.
Kumina HSSLC pass thar hi – distinction 701, I division 3250, II division 3970, III division pass 1896 an ni a. Zirlai zawng zawng pass vekna school hi arts-ah 46, science-ah 9 leh commerce-ah 2 awmin, candidate fail vekna arts leh commerce-ah school 2 a awm a, science-ah an awm lo.