Drug Demand Reduction

Mizoram tluka state pum huapa ruihhlo do beihpui thlak nasa hi state dang an awm ve lo maithei; an lo awm a nih pawhin an tam lovang. Keini danglamna chu, pawl hrang hrang leh kohhran hrang hrangte nen, (sawrkar pawh telin) heti khawpa ruihhlo do beihpui kan thlak nasa chung pawha, kiam lam pan lova a hluar tulh tulh tlat mai hi a ni.
Hei hi a chhan eng nge tiin zawhna siam ta ila, ruihhlo a lo lut nasa a, awlsam taka ruihhlo hmuh zung zung theih a nih vang, tih chu a chhanna tlanglawn a nih a rinawm.
Tun hnuah hian, ruihhlo tawlhrututen state danga ruihhlo tawlhrukna kalka bera min rawn hman tak avang hian a ‘Kg’ lawih lawiha man tur a awm ta reng mai a; hei hi chu state chhunga demand awm vang a ni hran lo tih kan hrethiam mai awm e.
Ruihhlo chungchangah hian, demand a tlem chuan supply pawh a tlem dawn tih hi thil chiangsa a ni. Ruihhlo demand-tute hi tu te nge kan tih chuan, ruihhlo thatlohzia leh hlauhawmzia hre lote an ni. Chung zingah chuan tuna naupang thang lian mek leh, thang lian tawh thalaite hi an tel a. Tuna kum upa tak tak, drug addict mekte pawh hi an upat tawh hnua ti leh hnuhnawh hi an tam vak lovang.
Ruihhlo hlauhawmzia leh thatlohzia hrechiang berte chu tuna ruihhlo bawiha kun mekte hi an ni. A tirah ruihhlo ruih chu nuam angin lang mah se, a lo rei deuh deuh a, an hreawm tawrh chhawkna turin ruihhlo an mamawh reng tawh a, an duh loh thil dawt sawi, rukruk leh a behbawm tih a lo ngai a, chu chu nuam an tih vang pawh a ni lova, an mamawh miau tawh avangin hreawm ti chung chungin an ti lo thei tawh lo a ni.
Heng zawng zawng hi tuna ruihhlo bawiha la tlu lut lo naupang thanglai leh thalaite hnenah hian a zau thei ang bera auchhuahpui a ngai a. Tuna naupang tam tak, ruihhlo bawiha tlu mekte zingah hian, ruihhlo thatlohna leh hlauhawmna an hriat loh avanga ruihhlo lo ti ve ta mai hi a tam zawk an nih a rinawm.
Tuna naupang leh thanglai mekte rilruah hian drug hnualsuatna thinlung kan tuh nghet thei a nih a, chutianga tan kan lak mar pat theih chuan, supply reduction lama buai pherh erh reng hi a tul tawh lo ngeiin a rinawm.