Drug lord El Mencho thihnain tharum thawhna a thlenah mi 25 vel thi tawh

Drug lord El Mencho thihnain tharum thawhna a thlenah mi 25 vel thi tawh
Drug lord thah a nih hnua Mexico-a Jalisco state-a tharum thawhna nasa tak thleng zuiah National Guard 25 vel an thi tawh tih a ram security minister-in a sawi.
‘El Mencho’ tia hriat lar, Nemesio Oseguera Cervantes-a hi Pathianni khan special force-ten an man hnu lawkah an kawl laiin a thi a, hei vang hian buaina nasa tak chhuakin state 20 vel a kang kai tawh.
Defence Secretary Ricardo Trevilla chuan a ram khawthlang lama venhimna tichak turin sipai 2,500 an thawn tih a sawi.
Jalisco New Generation Cartel (JNGC) hi Mexico-a mi sual pawl hlauhawm ber niin an hruaitu pawh hi Pathiannia man a nih hma khan an rama sorkarin mi a man duh ber a ni.
Mexico-a defence secretary chuan El Mencho-a hi a kawppui chhui fuhin Pathiannia an inhmuhnaah a man tih a sawi a. Man tuma thawk chhuak commando-te leh amah vengtute inbeihnaah amah pawh na takin a inhliam.
El Mencho-a hi sipaiten Jalisco-a Tapalpa khua atanga an khawpui, Mexico City an panpui laiin a thi.
Inkahnaah hian amah vengtu mi paruk pawh an thi a, venhim hna thawktu zinga pahnihin hliam an tuar ve bawk tih defence secretary chuan a sawi.
El Mencho-a a thih hnua tharum thawhna thleng zuiah hian tan in vengtu, state prosecutor pisaa member leh El Mencho-a kaihhruai pawla tel mi 30 vel an thi tawh niin Security Secretary Omar Garcia Harfuch chuan a sawi tih AFP news agency-in a tar lang.
President Claudia Sheinbaum-i chuan El Mencho thihna thlentu sipaite beihpui thlakna chu a fak a, a ngaih pawimawh ber chu ram puma muanna leh himna a awm chu a nih thu a sawi.
“Boruak dai a awm a, sorkar a awm a, sipaite an awm a, thawhhona tha tak pawh a awm,” a ti.
El Mencho-a a thi tih a darh chiah khan a kaihhruai pawl, JNGC awmna khuaa an member-te chuan khua leh khawpui eng emaw zat an bei zui.
Khaw thenkhatah chuan kawngpuiah perek leh thil zum an dah a. Hmun thenkhat dangah pawh bus leh lirtheite hruai khawmin kawngpui lun laiah an hal zui bawk.
Sheinbaum-i chuan kawngpui dan zawng zawng hi Thawhtanni tuk (India-a thimhlim) khan tihtlang leh vek a nih tawh thu a sawi.
Hetih lai hian cartel member-ten bank leh sumdawnna hmun tam tak halin an tichhe nasa hle a. Khaw thenkhatah chuan Pathianni khan thuneituten mi chengte chu pawn chhuak lo tura tiin khawlai pawh a reh hle.
El Mencho-a hi US State Department pawhin a man theih nana kawhhmuh theite hnena $ maktaduai 15 pek a tiam mek a ni.
Mexican defence ministry chuan zel Mencho-a man tum hian sipaite an thawk chhuak a, National Guard leh Airforce ten an pui bawk tih a sawi.
US-in man a nih theih nan ‘chinchang tha tawk tak an hrilh’ tih sawiin a thihna thlennaah erawh US hian inrawlhna a nei lo tih Pathianni khan an puang niin AFP chuan a tar lang.