Dua Lipa-i’n $15M chawi turin Samsung a khing

Dua Lipa-i’n $15M chawi turin Samsung a khing
British singer Dua Lipa chuan Samsung company chuan a phalna nei lovin a hlimthla te an TV-te hralh a kal lehzual theih nan an hmang ni a puhin, Samsung chu dollar maktaduai 15 chawitir turin court-ah a khing a, May ni 8, 2026 khan lawsuit a thehlut.
Dua Lipa chuan a complaint-ah hian a remtihna tel lovin a hlimthla te chu Samsung hian 2025-2026-ah TV hralh tur bawmah an nemkai niin a tarlang a, heng a hlimthla an hmanah hian copyright neitu a nih thu a tarlang bawk. Dua Lipa chuan copyright leh trademark bawhchhiatna bakah a publicity right te an bawhchhiatsak niin a tarlang.
Dua Lipa aiawhin Mitchell Silberberg & Knupp LLP ten Zirtawpni kalta khan Central District of California-a United States District Court-ah civil action document an theh lut a, Dua Lipa hian June 2025 atang khan Samsung hian a hlimthla an hmang tih a lo hre tawh a, titawp nghal tura hriattirna pawh a pe nghal niin an tarlang a, Samsung hian Lipa ngenna vawi khat mai pawh ni lo chu ngaipawimawh lovin an tilui ta zel a, vawiin thlengin bazar-a heng thil hi zawrh chhuah a la ni ta zel a. Hei vang hian hre reng chunga an tihluih tlat avangin tun hi an thleng ta niin an tarlang.
Samsung TV box-a Dua Lipa thlalak an tarlan hi Austin City Limits backstage-a 2024 a lak niin an sawi a, heng thlalak te hi Dua Lipa-in copyright a neih vek a nih thu an tarlang bawk. An lawsuit-ah chuan Dua Lipa chu rimawi sumdawnna lama a hlawhtlin dan te tarlang telin, khawvela brand lian tak tak pawhin an campaign-ah thawhpuiin a thlalak an hmang niin an tarlang a, chung Dua Lipa thawhpuitu zingah chuan Puma, Versace, Yves Saint Laurent, Porsche, Apple, Chanel, Tiffany & Co, Bvlgari leh Nespresso te pawh an tel tih an tarlang bawk.