Dul tihthep tum vanga zing lam chaw nghei a fuh lo

Tukthuan (breakfast) hi nilenga kan chaw ei zawng zawnga pawimawh ber a ni a, kan tukthuan ei hian kan taksa hriselna a nghawng nasa hle a ni. Tukthuan ei loh mai mai hi chin hauh loh tur a ni a, intihcher tum leh dul tihthep tum vanga tukthuan ei loh te tih reng reng loh tur a ni. Tukthuan ei loh chin hian type 2 diabetes risk a tisang tih hriat tel bawk tur.
Dul tih thep tuma tan lak hian hma a sawn mawh hlein kan hre thin, chutihrualin tukthuan ei dan dika kan nei chuan kan duh ang shape hi awlsam taka neih theih niin Times of India health section chuan an tarlang. Tunlaiah dulkiar kan tam ta hle a, kan khawsak awlsam leh awm awl leh eitui avanga hetiang hi tam ta kan ni te pawh a tih theih ang a, dulkiar chu a mawi lo a ni satliah mai lo va, taksa hriselna atan a tha lo hle a ni.
Intihcher a dul tihthep te i tum ve tawh thin a nih chuan mahni tawkin engtin emaw tak chuan hma i lo la ve tawh ngei ang a, mahse, i beisei ang result i nei lo a nih chuan i tih dan a dik lo deuh a ni mai thei! Intihcher tumte hi kan ei leh in dan a dik tawk lo thin a, chuvangin kan duh ang result kan nei thei lo thin. Tun tumah hian intihcher tumte tana tukthuan ei chungchanga hriattur pawimawh ni a mithiam te sawi kan rawn tarlang e.
1. Tukthuan ei chungchanga kan tihsual thin pakhat chu a ei hun hi a ni. Zing kan thawh atanga darkar khat chhungin eng emaw tal ei tur a ni. kan taksain hnathawh nan thahrui a mamawh. Zing thawh hlim darkar khat chhunga eng emaw tal kan ei hian metabolism a tichak a, intihcher tum te tan a tha.
2. Tukthuanah hian protein kan taksa mamawh khawp kan ei loh chuan kan ril a tam leh hma a, hmawmsawm kan tih tam phah a, thil kan ei tam phah leh zawk thin. Chuvangin tukthuan atan protein tamna chaw ei a tha.
3. Fibre pai tam chaw kan ei hian mi a tipuar rei a, chu chu intihcher tumte tan a pawimawh. Dul tihthep tumte tan nitin fibre gram 8 tal kan lakluh a ngai.
4. Calorie kan lakluh tlem hian kan rihna a tlakhniam chak phah kan ring thin, mahse, mithiam te chuan intihcher tumte tan tukthuanah calorie 350 tal ei a ngai niin an sawi.
5. Tukthuan ei loh chin hi thil pawi tak a ni. Tukthuan chu nilenga kan chaw ei zawng zawnga pawimawh ber a ni a, metabolism tihchak nen a pawimawh a, inticher tumte tan tukthuan ei ngei ngei zawk tur a ni.