Durtlang khama Saza humhalh

Durtlang khama Saza humhalh
Aizawl Forest Division leh Association for Environmental Preservation (ASEP) tangdun chuan Ningani khan Durtlang panna kawngpuiah Durtlang kham leh a chhehvela awm mek, state animal – Saza leh nungcha dangte humhalh campaign beihpui an thlak.
Bawngkawn Shalom Vengtharah hun hmangin street campaign neih a ni a. Aizawl Forest Division thawktute leh ASEP member bakah helai vela cheng khawtlang mi thenkhat an tel a ni. Campaign hun hman bakah hian a chhehvela cheng chhungkuate hnena ngenna lehkha sem a ni bawk.
Durtlang kham leh a chhehvelah hian Saza engemawzat an inthlahpung tawh a. Tun dinhmunah phei chuan an ngam tawhin mihring chenna in bul lawk lawkah hial an inlan ngam a. Tu kutpalh mah an tawh lohna turin theihtawp chhuaha beihpui thlak zel a ni dawn a, dan bawhchhia an awm a nih pawhin ngaihhnathiamna awm loin dan ang takin kalpui a ni dawn tih campaign-ah hian sawi a ni.
Aizawl khawpui chhungah ngei state animal leh nungcha dang dang hmuh tur a lo awm leh ta chu a lawmawm takzet tih ASEP chuan sawiin, humhalhtu ni turin Zoram mipui an ngen tih a sawi a ni.