VC term pawhtawi chungchanga khinna Court-in February 3-ah tichiang thei ang

Mizoram sawrkarin village council term a pawh tawi avanga Gauhati High Court-a sawrkar khinletna chu court hian a ngaihtuah mek zel a. February 3 hian thuthlukna siam thei tura ngaih a ni. The Aizawl Post thudawn danin, Gauhati High Court Aizawl Bench hian Ningani – January 30 khan he khinna chungchang hi a ngaihtuah a, a khingtute aiawhin an ukil-ten an sawi duh an sawi a, sawrkar ukil-ten an sawi duh an sawi bawk a. Court-in VC term a pawh tawi leh hemi kaihhnawih dan awmte court hmaah an chhawpchhuak a ni.
January 24 khan sawrkar lam hian court-ah insawifiahna a thehlut a, a khingtu lamin January 29-ah sawi duh an neihte ziakin an thehlut ve leh a, January 30 khan hearing neih a ni ta a ni. Court hian sawrkar record hi fiah deuh zawka hriat a duh a, karleh Thawhtanni – February 3 hian heng hi court-ah chhawpchhuak tura tiin, hetah hian thuthlukna pawh siam theih nghal beisei a ni.
Tarlan tawh angin, VC term pawh tawi avang hian All Mizoram Village Council Association (AMVCA) chuan High Court-ah sawrkar khinlet a lo rel thlu tawh a, association hminga an khinna chu, sawrkarah AMVCA hi ‘registration of firms’ hnuaia inziaklut lo a nih loh avangin kumin January 13 khan court hian an khinna (petition) thehluh hi dan angin a lo dawngsawng thei lo, tiin a lo hnawlsak tawh a ni.
Document tul angte la felin January 14 khan mimal hmingin High Court-ah hian petition thehluh lehnghal a ni a, hei hi court hian pawmsakin, hearing neih chhoh a ni ta a ni.
Ningania court-in he thu a ngaihtuah dawn hian mimal hming tumtu East Lungdar VCP K Lalngaizuala leh VC treasurer chu VC dang 122-in a khingtu (petitioner) a tel ve an dilna pawh ngaihtuah tel nghal a ni.
Mizoram sawrkar chuan 2024 November 20 khan hriattirna tichhuakin, village council term dinglai, 2025 September-a tawp tur chu 2025 February 19-a tawp turin a pawt tawi a. Sawrkar hriattirna tih chhuah hi AMVCA-in a khinlet zinga a tel laiin, sawrkar hian 2024 November 21 khan hriattirna dang tichhuakin, hemi hmang hian 2024 November 20-a hriattirna lo tih chhuah tawh chu luahlantir nghal a ni. Hriattirna tih chhuah thar zawk hi a copy pek an nih ve loh avang leh social media lamah pawh hmuh tur a awm loh avangin High Court-a lehkha an thehluhah dt.20.11.2024 notification chauh an thehlut a, notification thar tihchhuah hi sawrkar ukil-ten court-a lehkha an thehluh atanga an hmuh ve chauh avangin, he notification khing tel tur hian an writ petition thehluh hmasa zawk hi hnuhdawh a ngaih phah tel bawk tih AMVCA lam chuan an lo sawi tawh a ni.
Hetianga court-a thu a inchiah mek lai hian State Election Commission Mizoram chuan February 12-a VC leh LC inthlanpui neih turin a puang a. Thuthar thehdarhtute zawhna a chhannah commissioner Dr H Lalthangliana chuan, local council leh village council term tihtawp emaw pawhsei emaw chu state sawrkar thuneihna a ni a. SEC chuan term tawp hmaa inthlan leh a kaihhnawih buatsaih fel kha a hna a ni thung a; tunah sawrkarin February 19-a LC/VC term tawp tura a tih avangin chumi hmaa inchingfel tur chuan an ni chuan inthlan hi an huaihawt mai dawn tih a sawi a. VC term pawh tawi chungchanga Gauhati High Court-a kal an awm thu chu SEC-in a hria a, court hian inthlang rih lo tura a ti a nih loh chuan, an inruahman dan ang hian an ni chu an kal mai dawn, tiin a lo sawi tawh bawk a ni.