Duty laia police thite sunna hmang

October 21 hi India ram pumah ‘Police Commemoration Day’ atana hman thin a ni a. Mizoramah pawh he ni pual hian Inrinni khan hun hman a ni.
India ram chhhunga awm Aksai Chin pela ralthuam famkim nena rawn lutru China sipaite chuan mahni ram venghim tura duty mek India Police-te chu Hot Springs (Ladakh) ah 1959 October 21-ah an lambun a, police 10-in nunna an chan a ni. He ni hi ram tana nun pe police-te hriatrengna “Commemoration Day” atan India sawrkar chuan puangin, ram pumah kumtin hman turin a rel a ni. Hemi ni zing dar 8-ah hian India ram state capital-ah leh district headquarters-ah Commemoration Day parade neih thin a ni a, India ram puma police duty laia thite hriatrengna leh sunna hman thin a ni.
Kuminah Mizoram Police zingah duty laia hmelma kuta thi an awm loa, kum 1966 atanga vawiin thlengin Mizoram Police zingah duty laia nunna chan mi 54 an awm tawh.
Mizoramah pawh October 21 zing dar 7 khan district headquarters leh Battalion headquarters-ah neih a ni a. A hmanna pui ber Aizawlah chuan “Martar Thlan” 1st Bn. MAP Hqrs. Armed Vengah Mizoram DGP Anil Shukla leh police officer-ten hun an hmang a, CRPF, BSF, SIB leh Assam Rifles atangin aiawhte an tel bawk. India ram hmun hrang hranga police, 1.9.2022 atanga ni 31.8.2023 inkara duty laia nunna chan mi 188-te hming chhiarchhuakin, martar thlanah zahna pangpar dah a ni.