Dy CM candidate chauh neih ngam hi mit siaitu an awm a ni – MPCC

BJP-in chief ministerial candidate nei loa deputy chief minister candidate an nei ngawt mai chu mit siaitu an awm ngei tih tichiangtu a ngaih theih tih Congress party chuan an sawi.
MPCC Media department chairman Remruata Renthlei chuan BJP-in a party mala kua an hreuh theih lohna tur nia an hriat Mizoram bakah India ram state dangah pawh regional party-te thawhpuiin sawrkarna chang anga tarlan an ching a. NDA-a rei tak an lo thawhpui tawh MNF chu sawrkar siampui theih tura an ngaih chiah loh avangin MNF thlakna atan regional party dang ZPM belbulin, tlinna bial tur pawh nei mumallo khan deputy CM candidate an nei ngawt ngam chuan ZPM party leh an hotupa Pu Lalduhoma mit siai an hmu a nih ngei a rinawm tih a sawi.
ZPM leader Pu Lalduhoma’n NDA/ BJP chu Mizorama AMC inthlan leh MLA by election ah a lo thawh pui tawh bakah phone call leak out leh tunhnaiah BJP hotute nen Guwahati-ah an inbia nia sawite atangin, BJP hotute leh Pu Lalduhoma hian mipui nawlpui leh an party mi tam zawk pawhin an hriatpui lem lohin inremsiamna thutlung an lo nei daih tawh tia ngaih theih a ni tih a sawi a ni.
“Heti hian zawi zawia MNF thlauhthla in ZPM chu thawhpui theih zawka an ngaih vangin BJP hian ruahmanna fel tak an nei thlap niin a lang a. Tuna kan ram dinhmun dik tak chu MNF leh ZPM hian NDA/BJP a tlatlum zawk nih an inchuh mek a. Mipui hriatah a hmingin han inbei ve bawk thin mah se, blood group pakhat nei an nih avang leh hman atanga lo thawkho thang an nih avangin an tan sawrkar intawm siam turin thian hlui chaweikhawm ang chauh kha a ni dawn a ni,” a ti.