Ebola darh chak takin ‘dinhmun hlauhawm’ siam – MSF

Ebola darh chak takin ‘dinhmun hlauhawm’ siam – MSF
Democratic Republic of Congo-a Ebola leng darh chak tak chuan ‘dinhmun hlauhawm tak’ a siam mek niin damdawi thila mi tanpuitu pawl, Médecins Sans Frontières (MSF) chuan a sawo.
World Health Organization (WHO)-in hri leng a puan atanga chawlhkar hnih hnuah MSF hian a sawi a, Deputy Director Dr Alan Gonzales-a chuan tun hmain hetiang zat ‘kai tam’ hi chhinchhiah a la ni ngai lo tih a sawi.
MSF-in hetiang a puang hi WHO chief Dr Tedros Adhanom Ghebreyesus-a’n Congo khawchhak lam province, hri kaina hmunpui ni mek, Ituri tlawha a darh zel lohna tura hmalaknate a enpui lai a ni.
DR Congo-ah hian Ebola vei nia rinhlelh mi 1,000 chuang an awm tawh a, a tlem berah mi 246 an thi tawh bawk a. An thenawm, Uganda-ah a kai hmuh chhuah mi pakua an awm tawh a, mi pakhatin a thihpui tawh bawk.
Inrinni khan Gonzalez-a chuan thuchhuah siamin, “Ituri Province-a Ebola leng puan a nih atanga chawlhkar hnih hnuah thil awm dan hi a hlauhawm hle a ni,” a ti.
“Ebola a leng tih puan a nih hnu lawkah hetiang zat kai hi a la awm ngai lo,” tiin, a hmuna a team-te chuan ‘hripui darh chak lutuk hi an la phak lo hle tih an hmu’ tih a sawi.
“Tunlaia thil thleng tak chu a nasat dan tumahin an la hre lo va. Ni tin rinhlelh thar an awm a, chutih rualin sample za tam tak chu test loh a la ni,” a ti bawk.
Gonzalez-a chuan hri a darh zel lohna tura hmalakna leh puihna thawnte chu ‘harsatna lian tak’ avangin a tlai tih a sawi a, hei hi ramri leh thlawhna tumhmun khar a nih vang pakhat a nih thu a sawi.
WHO pawhin DR Congo-a buaina chhuak mekin Ebola leng dona chu nasa takin a tibuai niin a lo sawi ve tawh bawk.
Inrinnia Ituri province khawpui, Bunia a thlen hnuah Tedros-a chuan a team-te nen DR Congo-ah an awm tih a sawi a, ‘engtin nge hri leng dona a kal zel tih leh tanpuina kawngah harsatna a awm em tih en turin’ a nih thu a sawi.
Hri lenna hmunpui bera mite chu natna dona kawngah chanvo pawimawh tak an nei tih a hrilh a. Mitthi vuinaa an thil tih dan thin chu a pawimawhzia a hriat thiam thu a sawi rualin tunah erawh hetiang hi a hlauhawm tih a hrilh bawk.
“Ebola vanga thite ruang khawih pawh hri darhna a ni thei a. Kan hloh tawhte avanga kan lungngaih lai hian mi dang kan hloh zui loh nan theihtawp kan chhuah a ngai a ni,” a ti.
Bunia-ah hian ni tin khawsak dan a la danglam lo va, miten an thil tih pangngai an thawk chhunzawm zel.
WHO chief hian Bunia-a National Institute for Biomedical Research laboratory a tlawh hmasa bera a, hetah hian Ebola vei nia rinhlelh sample lakte endik a ni.
Tual chhung damdawi in thuneitute chuan he facility hian darkar 24 chhungin result a pe thei tawh tih an sawi a, hei hian doctor-te chu rang taka hriatchhuah leh enkawl theih nan a puih thu an sawi.
Hetih lai hian Brazil-a damdawi in thuneitute chuan Inrinni khan São Paulo state-a Ebola vei nia rinhlelh pakhat an chhui mek tih an sawi a. Chanchinbute chuan mipa kum 37 mi hi tun hnaia DR Congo atanga haw a ni tih an sawi.