Economic nationalism-a harh a ngai – K Vanlalvena

Political nationalism leh religious nationalism-ah Mizote kan harh viau tawh laiin, intodelh turin economic nationalism-a harh thar a, kan ngaihpawimawh ber a tul tih Rajya Sabha MP K Vanlalvena chuan a sawi.
Zirtawpnia MNF office Mizo Hnam Runa inkhawmah K Vanlalvena chuan, kan ram dinchhuahna turin economic nationalism ngaihpawimawh hmasak ber a tul a. Nationalism nei lo hnam an ding chhuak ngai lo tih a sawi.
“Maruari ho hi Vai sumdawng hausa hming emaw kan ti hial tawh a, hnam hming tih hre lo tam tak kan awm tawh. India ramah sumdawn an thiamin an hausa em em a, UT leh state erawh an nei lo. Nationalism an neih loh vang a ni. Hnam dingchhuak tawh sa pawh nationalism an neih loh chuan an buai zel,” a ti.
Mizote political nationalism-ah kan thangharh tawh hle a. Assam, Manipur leh Burma lamah buaina kan tawh changin kan tangrual tha a, economic nationalism-ah erawh kan mit a la keu lo hle tih Rajya Sabha MP hian a sawi. Religious nationalism vawngnung zelin, economic nationalism ngaipawimawh ber a tul tih a sawi a. “Tangkaa hausa ringawt hi hausa an ni lo, sawrkar hnathawk hlawh pung thur thurin kan per capita income sang hle mah se, Vai ram atanga eitur kan chawkluh theih loh chuan kan nghei a ni mai,” a ti.
Khawvela ram lian apiang economic nationalism-ah an chiang tih a sawi a. Dawra artui zawrh tam zawk Vairam atanga lakluh, ar leh bawng chaw tur buh, vaimim leh bekang kan ramah a that duh em em laiin bawng pawh khawchhak lam atanga lakluh a ni, tiin, economic nationalism-a harh thar a tul hle tih a sawi a ni.