Mizorama rawn kal Assam Power minister Nandita Garlosa chu Power & Electricity minister F Rodingliana chuan Ningani tlai khan a chenna inah a lo kawm a. Power sector lama state pahnih bakah hmarchhak state dangte intelkhawm a, thawhhona tha zawk neih dan tur an sawidun.
Mizoram minister hian sawrkar laipui Ministry of New & Renewable Energy hnuaia Small Hydro Project Incentive Scheme, central ministry-in state sawrkara tanpuina a pekchhuah thin ennawn tura dah mek chu rang taka central cabinet-in a pawm theih nan bawhzui dan tur a sawipui a. North East Regional Power Committee (NERPC) intawhkhawm leh hmasak berah he scheme hi sawi ho a nih a, agenda-a telh a nih theih nan NERPC chairman a nihna anga hma lakpui tura sawmin, central cabinet pawmpui tura NERPC-in a chhawp chhuah theih dan tur an sawidun a ni.
Assam minister hian Mizoram Power minister rawtna chu pawimawh a tih thu sawiin, hma lak ho zel a nih tur thu a sawi a ni.
Minister pahnih hian hmarchhak state-ten kawlphetha siamchhuah kawngah theihna sang tak nei siin, kan la hnufum hlea an hriat thu an sawi a, tan lakna tur hrang hrang an sawidun a ni.
Minister F Rodingliana hian Nandita Garlosa hnenah kawlphetha siamchhuah kawnga an thlen chin leh hmachhawp hrilhin, Indian Electricity Act hnuaia dan zam, Renewable Purchase Obligation (RPO) pawh Mizoramin a la tihhlawhtlin theih loh avangin kumtin cheng vaibelchhe tel Mizoramin a chawi thin tih a sawi a. RPO hi Mizoramin a tlin ngei theihnan hydro power project lamah hma lak nasat an tum a, hemi kawngah central ministry tanpuina a tam thei ang ber NE state-ten an dawn theih nan tanrual a tul thu a hrilh a ni.
Power minister pahnih inkawm
Get real time updates directly on you device, subscribe now.
Prev Post