ED chief hun pawhsei belh a ni lovang : Centre

Centre chuan May 8 khan Supreme Court hnenah Enforcement Directorate (ED) chief Sanjay Kumar Mishra hun chu November 2023 hnu lam thlenga pawhsei a nih tawh loh tur thu a hrilh.
Justice B.R. Gavai kaihhruai Three-judge Bench hnenah Solicitor General Tushar Mehta chuan Financial Action Task Force (FATF) evaluation kalpui mek avangin Mishra chu a term a tum thum nana pawhseiin a awm phah a ti a.
Hearing neih hnuhnung berah court chuan Centre chu Mishra chu ED tan ‘a tel lova awm theih loh em ni’ tia zawhna zawtin sorkar chuan amah thlaktu tur a hmu zo ngang lo em ni a lo ti tawh bawk a.
“He officer (Mishra) hian November 2023 hnu lamah a hna a chelh zui thei tawh lo. Tunah erawh FATF peer review kalpui mek a ni a. Kum 2019 a neihfel tura tih kha ni mah se, COVID avangin neih theih a ni lo. Tumah hi a tel lova awm theih loh an awm lo. Eng pawl mah hi mi pakhat awm loh vang maiin a chhe nghal thei lo, mahse, officer pakhat tun hnai kum thum chhunga institution kaihhnawih hre vek chuan danglamna a siam thei a ni,” tiin Mehta chuan a sawi.
Kum 2021 khan apex court chuan sorkar chu Mishra hun pawtsei tawh lo turin a lo ti tawh a. Mahse, sorkar chuan court-in thupek a pek hnu lawk thla hnih hnuah Central Vigilance Commission (CVC) Act chu a siam danglam zui ta a ni. Chu dan siam danglam hmang chuan Mishra hun chu November 2022 thlengin pawhseiin a awm leh a. Chu dan denchhen tho chuan sorkar vek chuan 1984-batch Indian Revenue Service officer chu November 2022 khan a hun a pawhsei sak leh a, November 18, 2023 thlengin a hna ngai a chelh dawn a ni.
“FATF chu kum 2019-ah kalpui dawn a ni tih in hre lawk a nih chuan kum 2021-a court-in judgement a siam hma khan eng vanga sawi lang lo nge in nih? Khatih lai khan investigation turu tak kalpui a awm mek thu leh Mishra chu chumi atan chuan mamawh a nih thu chauh in sawi a nih kha. Kha vang khan court chuan November 2022 thlengin a hna ngai a chelh a remtihsak che u a nih kha. He FATF argument hi in ngaihtuah nawn leh hnuah min hrilh chauh em ni?” tiin Justice Gavai chuan a a zawt a.
Mehta chuan ED Directorate chu promotional post a ni lo tia sawiin, Mishra hun pawhsei avangin tute mahin an acareer opportunity an hloh dawn lo tiin a sawi.
May 3 khan court chuan apex court judgement awm chunga centre in Mishra hun a pawhsei zelah zawhna khauh tak tak a zawt tawh bawk a.
“He organisation ah hian midang an awm hlawl lo em ni? ED-ah hian he hna chelh thei mi laktlak dang an awm lo em ni? Kum 2023-ah a chawlh hunah eng nge thleng ang?” tiin court chuan zawhna a zawt a ni.
He petition hi Congress party thupuangtu Randeep Singh Surjewala, Trinamool Congress leader Mahua Moitra, social activist leh Madhya Pradesh Congress Mahila Committee General Secretary Jaya Thakur te theh luh a ni a. Duhsak uchuak bik neiha hna chelh hun pawhsei sak reng chuna ‘institutional independence’ a khawih buai an ti a ni.