Ed Sheeran-a’n kum 10 chuang phone a neih tawh lohna chhan a puang

Ed Sheeran-a’n kum 10 chuang phone a neih tawh lohna chhan a puang
Zaithiam leh hlaphuahthiam hmingthang Ed Sheeran hian kum 10 teh meuh chu ama pualin phone a nei tawh lo a, hetianga 2015 atanga phone a neih duh tak lohna chhan hi Accor Stadium-a mipui 70,000 hmaah a puang ta a, copyright lawsuit avanga phone nei duh ta lo a nih thu a sawi.
British singer Ed Sheeran hian Loop Tour a neih meka February ni14 atang khan Sydney-ah hian zan thum show nei turin bula a tan a, Accor Stadium-a a concert chhimtu mipui 70,000 hmaah a hla hit ‘Castle on the Hill,’ ‘Shape of You’ leh ‘Perfect’ te pawh a perfrom a, mahse, show kal tluan laiin a zai chawlin, 2015 a dollar maktaduai 100 chawi tir tuma copyright lawsuit chungchang a sawi chhuak ta a ni.
2014-a Ed Sheeran hla tihchhuah ‘Thinking Out Loud’ chu Marvin Gaye hla ‘Let’s Get It On’ nen inanna tam tak a neih avangin Sheeran hian Marvin Gaye hla hi a phalna nei lovin a copy a ni tiin an puh ta a. He thubuai hi kum 8 zet an chai hnuah 2023 khan New York jury ten Sheeran hian 1973 classic “Let’s Get It On” hi a hla ‘Thingking Out Loud” atan hian a copy lo e, tiin thutlukna an siam ta a ni.
Sheeran chuan, “Kum chuang chhung khan ka hming chanchinthara in hmuh chuan 2015 copyright lawsuit nena inkungkaihna eng emaw tal a nei ngei ang. Mi hlaphuah ru a puh ka ni a, min khing a. Chutiang ka ti der si lo ang, court-ah ka ti lo tih ka finfiah a tul ta a,” a ti.
Hetiang thil velah hian a electronic bungraw hrang hrang te chu an case buaipuitu te hnenah a theh luh a ngai ta a, anni hian message leh file hlui te an lo chhui kir dawn a ni. Sheeran chuan he lawsuit an file atang hian mobile phone a la nei leh ta lo niin a sawi a, “2015 khan Multiply tour hetah (Australia) hian ka rawn nei a, ka tour a zawh khan ka off ka switch off ka tih la hria a, khata tang khan mobile phone man leh hi ka duh ta lo. Email lamah ka insuan a, khata tang khan inbiakpawh nan email ka hmang ta ber a ni,” a ti.
A phone switch off vang vang tawh chu email leh text message endik turin a han tinung leh ta a, 2015-a kir leh ang mai kha niin a ngai a. “2015 chauh pawh a ni lo, 2007, he phone number ka hman tanna a kir leh ang mai ka ni,” tiin thiante nena an inbiakna hlui, a phone a ‘off’ hnua mual lo liam tawh te leh a chhungkhai laina hnai rei tak a biak tawh loh te nena an inbiakna hlui te a hai chhuak leh ta a, chu chuan 2025-a a album ‘Play’ a hla pakhat ‘Old Phone’ kha a rawn hring chhuak ta a ni.