EF&CC Minister-in National Wildlife Week’ vawi 71-na hmanpui

EF&CC Minister-in National Wildlife Week’ vawi 71-na hmanpui
Nimin khan Environment Forest & Climate Change (EF&CC) Department buatsaih ‘National Wildlife Week’ vawi 71-na hawnna inkhawm chu Lalthansanga, Minister, EF&CC Department chuan Assembly Conference Hall, Assembly Annexe-ah khuallian niin a hmanpui.
Minister Lalthansanga chuan ramsa leh nungchate humhalhna kawnga Forest Department-te hmalakna chu fakawm a tih thu a sawi a. India ram puma ramsate humhalhnan sawkar laipuiin 3rd National Wildlife Action Plan 2017-2031 a duan thu tarlangin Mizoramah pawh he plan hi tha taka kalpui a pawimawh thu a sawi a. Mihringte leh ramsate hi kan inmamawh tawn avangin kan awmna theuhah inrem taka cheng za a, ramsate tana hnawk lo zawnga mihringte pawh kan awm thiam a ngaih thu a sawi a. Aizawl Western Bypass Road laih mekah pawh Forest Department chuan ramsate thlamuang taka an awm theih a ngaih pawimawh thu a sawi a. Wildlife Protection Act 1972-in a humhalh ramsate kah hi dan anga na taka hrem theih a nih thu tarlangin Mizote pawhin rannung kah leh sa pelh kan sim a pawimawh thu a sawi bawk. Ramsate leh nungchate humhalhna tura sawrkarin dan a siam hi zawm tum theuh turin kalkhawmte a chah bawk a ni.
Sudhir Kumar, Principal Secretary, EF&CC Department chuan khawvel hi mihringte tan chauha siam a ni lova, ramsa leh nungchate nen inrem taka cheng za tur kan nih thu a sawi a. Ramsate humhalh kawngah sawrkar, khawtlang leh mipui tan ho a pawimawh thu a sawi bawk.
National Wildlife Week hawnna inkhawmah hian ‘Status of Wildlife in Mizoram and Its Need of Conservation’ tih thupui hmangin, Prof. H.T. Lalremsanga, HOD, Dept. of Zoology, Mizoram University leh Pu Amit Kumar Bal, Ph.D Scholar, Dept. of Zoology, Mizoram University hnen atangin presentation thlirho a ni.
National Wildlife Week hi kum 1955 atang khan kum tin ram pum huapin October ni 2 atanga ni 8 chhung hman thin a ni a, kumin thupui atan : “Human – animal coexistence” thlan a ni.