EF&CC phalna lo chuan ram ngaw ah kut a thlak theih loh – EF&CC minister

EF&CC phalna lo chuan ram
ngaw ah kut a thlak theih loh
– EF&CC minister
Ramngaw humhalh kawngah hmasawnna kaihhnawih pawh nise, Environment Forest & Climate Change department phalna lo chuan kut a thlak theih tawh dawn loh tih minister Lalthansanga chuan a sawi a. Ram a kal dik dawn chuan dan a lal a tul tih a sawi.
Conservator of Forest (Eastern Circle) Auditorium Champhai Bethel Veng leh Interpretation Center, Botanical Garden Zotlang Hmunhlui Champhai ami chu Thawhlehni khan EF&CC minister hian a hawng a. Ramngaw chu ram hnuk pawimawh tak pakhat a ni, tiin, ramngaw humhalh tura khauh taka kal chu ram venhima kawng chi khat a ni tih a sawi. Thal tirah lui an kang der tawh nia sawiin, tui indaih lohna a nasa tial tialah tuihna humhalh chu chona lian tak a ni tih a sawi bawk.
Forest department chu mipui tana ding an ni a, an nihna hriat chian loh avanga hnawk emaw an ti thin chu pawi a tih thu Lalthansanga hian a sawi a. Forest kaihhnawih dan tam ber chu state level-a thutlukna siam theih ni lo, sawrkar laipui leh ram pum huap thil a nih avangin mipui hriatthiamna a ngen tih a sawi a ni.
Conservator of Forest (Eastern Circle) Auditorium hi ‘Maintenance of Forest Fund 2023- 2024’ hnuaia sum cheng nuai 44 hmanga sak a ni a. Kumin July 10 khan sak tan niin, December 12-a zawh a ni. Interpretation Center, Botanical Garden hi ‘Maintenance of Forest 2023- 2024 hnuai sum cheng nuai 40 hmanga sak a ni a. Kumin July 1-a sak tan a ni a, December 10-a zawh a ni. Zotlang Botanical Garden hi 2022 June 2 khan a lungphum phum a lo ni tawh a ni.