Mexico-ah Egg Fair an hmang a, chutah chuan mi 2,000 chuang chu thirfiante a artui pum khat dah chunga intlansiakin, Guinness World Records an siam. He Egg Fair hi Tepatitlan Poultry Farmers Association, Jalisco te buatsaih a ni a, thirfiantea artui dah chunga intlansiaka hian an khaw high school zirlai 2700 dawn an tel.
He egg & spoon race-ah hian thirfianteah artui pum khat dahin, thirfiante chu a fawng lamah kutin an chelh a, tichuan an intlansiak ta a ni. Artui chu tih tlak loh tur a ni a, meter 100 (feet 328) a tui an intlansiak a, dan bawhchhe miah loa a tawp thleng thei mi 2,039 an awm a, egg & spoon race a tlan chhuak tam ber record an siam ta a ni.
A hmaa hetiang record chu London-a mi 1,400-in an siam niin, he record hi Mexico hian a rawn khum ta a ni.
Jalisco hi artui lama hausa zet mai khua an ni a, Mexico-a artui an tharchhuah zawng zawng 50.4% zet chu Jalisco a an thar niin, he egg fair-ah hian egg & spoon race bakah artui thuhruk inzawn hmuh siak te pawh an telh a, an khaw artui thar hmanga eitur an siam chi hrang hrang an pho chhuak bawk.
Egg & spoon race world record
Get real time updates directly on you device, subscribe now.
Prev Post