Egypt-in Gerd vangin Ethiopia sel na hle
Egypt chuan Ethiopia in sawisel hlawh Blue Nile river a hydroelectric dam a tihkhah tak thu a sawi avangin a thinrim thu a sawi.
Ethiopia hi Egypt leh Sudan nen kum 2011 a kalpui tan megaproject avangin an inbakaih reng a. Egygpt hi a tui mamawhna river Nile-a innghat bur a nih vang a ni.
Egypt foreign ministry chuan Ethiopia chuan Nile lui luanna ram dangte zahpahna a nei lo tiin a sawi a. Ethiopia chuan an dam siam chuan Nile luitui insem a tihtlem phah dawn chuang lo tiin a sawi ve thung.
“Renaissance Dam tuikhuahna tawp ber leh palina ni bawk chu hlawhtling taka kalpui a ni ta” tiin Ethiopian Prime Minister Abiy Ahmed chuan a sawi a.
He project hian ‘ram chhung leh pawnah’ harsatna tam tak a paltlang tia sawiin ‘chung te chu kan dodai vek a ni’ tiin a sawi bawk a. He dam hian February 2022 atang khan eletricity a pe chhuak tan a ni.
Ethiopia chuan Grand Ethiopian Renaissance Dam (Gerd) chuan ramin electricity a harchhuah chu a letin a tipung dawn tia sawiin chu chu development atana pawimawh lituk tiin sawi a, tun dinhmunah a mipui maktaduai 127 velte chuan electricity mamawh tawk an nei lo tiin a sawi a.
He Gerd atang hian electricity 6,000 MW siamchhuah a ni thei dawn a, dam hi Ethiopia leh Sudan inrina 30 km leka hlaa awm a ni bawk.
Egypt leh Sudan te chuan Gerd hman dan turah inremtlanna awm ngei se tiin an nawr thung a, tun ang renga thil a kal a nih chuan energy mamawhna nei san gbawk si Ethiopia chuan a tuikhuah hmangin an tui tlan tur a titlem thei tlat an ti ve thung.
Gerd chungchanga inbiakna chu hun rei tak chawlhsan a nih hnuah thla kalta khan bultan that leh a ni bawk a ni.
Hetih lai hian Egyptian foreign ministry chuan Ethiopia-in dam a chhun khah chu ram pathumin kum 2015-a declaration of principles an ziah kalh a ni tia sawiin dan bawhchhiatna tiin a sawi a.
“Declaration kan siam hmangin dam tihkhah dan turah ram pathum ten remtihna kan pe tur a ni tih a ni” tiin thuchhuah chuan a tarlang a.
“Ethiopia-in min rawn hauh lova ama duhthua dam a tikhat hi he lui lian zelna ram te zahpah lohna niin water security, principles of international law in a siam te zahlohna a ni” tiin a sawi bawk.