JICA Sustainable Farming System (JIFAS) chungchang chu Zirtawpni khan Irrigation & Water Resources minister C. Lalrinsanga hoin zirchian a ni.
-- Advertisement --
Buh leh bala Mizoram a intodelh theihna turin kum 2013- 2015 ah JICA (Japan International Cooperation Agency) leh Mizoram chu thawk dunin Mizoram dinhmun zirchian a ni tawh a, he zirchianna behchhan hian master plan siam a ni. Master plan tihlawhtling tur hian JICA leh Mizoram hi kum 2015- 2023 chhung atan Technical Cooperation Project (TCP) hnuaiah thawk dun lehin, TCP hian Mizoram tana farming system tha ber tura a ngaih JIFAS hi a chhawpchhuak a. JIFAS hi Mizoram sawrkar pawmpui tura hmalak mek a ni.
He system thar hi department hrang hrang – Agriculture, Horticulture, Land Resources Soil & Water Conservation leh Irrigation & Water Resources thawhhona a ni a. JIFAS-in a tum ber chu, kum 2015 atanga 2035, kum 20 chhunga kum tin 4% a ei leh bar dinhmun ti thang zelin, kum 2035 ah chuan ei leh barah Mizoramin tun dinhmun atanga 50% tala hma a sawn theih nana hma lak a ni.
JIFAS hnuaiah hian RD Block 27 huamchhungah CSS fund awm theite hmang tangkaiin a indawta hma lak tum a ni a. Loneitute duhdan leh mamawhte line department nen zirchiang hmasa in, an hmunhma enpuiin a ram mil tur ang leh an hlawkpui tur an duang anga, plan fel tak siam hoin loneituten an mamawh ang zelin tlangram hmun nghet leh phaizawl lo neih chhunzawm chungin tui leh thlai chawmna tura hmanraw mamawh duangin fund awmte a tha thei ang bera hman tum a ni dawn a. Line department leh loneituten kum 5 atana ruahmanna an siam bakah kum khat chhunga hmalak dan tur an siam ang. Uluk taka an vil bakah a hun tak leh dik taka tih a nih theih nan an enpui dawn a ni. Hetiang, bottom-up approach leh convergence planning hi kalpui tawh chinah a hlawhtling hle tih sawi a ni.