Eirukna lakah sawrkar hnathawkte fihlim tur – Lalduhoma

Chief Minister Lalduhoma, Finance Minister ni bawk chuan, “Kalphung thar sawrkarah officer-te eirukna lakah an fihlim ngei tur a ni,” tiin a sawi. He thu hi nimina Mizoram Finance & Account Service Association 29th Annual General Conference 2024, Aijal Club-a neih a hmanpuinaah chief minister hian a sawi.
“Kalphung tharah, sawrkar hnathawkte, eirukna lakah kan fihlim ngei ngei tur a ni. Nangni kan Finance Officer-te phei chu in dik mai a tawk lo, mi dangin mi dik in ni tih an hmuh a ngai. Sawrkarin hnathawk a lak hian human resource investment a nei tihna a ni a, kha hnathawktu kha sawrkar tana thawk chhuaktu tangkai a nihzui ngei a ngai,” tiin chief minister chuan a sawi.
Staff-te welfare ngaihthah lo tura officer-te fuih in, “Post sang lam kan ngaipawimawh thin a, a hniam lamah nasa takin kan tla bal mek. Hei hi kan siam that thuai loh chuan department leh office tam tak hi hnathawk hlei thei lovin an awm thuai dawn,” tiin a sawi bawk.
Chief Minister chuan Finance leh Planning lam a that loh chuan sawrkar sum kalphung leh hmalakna a kal dik thei thin lo va, an pahniha an chak hi a ngai thin, a ti a. Hei hi sawrkar hian a ngaih pawimawh avangin hun rei lo te chhungin finance leh planning lamah thil inthlakthleng duhawm tak tak kan hmu tawh a ni, a ti.
Inrenchemna lamah Assembly legislators ten bul an tan tih a sawi a, kan hamthatna kan titlem a, official ten in rawn zui a; vawiina MLA leh Minister ten hamthatna an dawn mek hi party tin aiawh MLA te telna, Assembly General Purpose Committee pawmpui a ni, a ti.
Local audit tihchak a nih thu a sawi a, kalphung tha zawk a awm theih nan special audit kalpui a nih thu a sawi bawk.
Chief minister chuan sawrkar thar budget hmasa ber chu kan dinhmun dik tak tarlang thei tura duan (realistic budget) a ni, a ti a. Data neih ten duhthu a la sam loh thu sawiin, data dik tak neiha kan nihna dik tak hriat hi tul kan ti a, data dik neih kawngah hmasawn zel kan tum, a ti bawk.
A tlem thei ang ber sum puk tum a nih thu leh, state matching share nei sang chi scheme pumpelh a tul thu a sawi a. Overdraft lo va kal hram tum a nih thu leh, K-deposit pawh tihtlem tum a nih thu a sawi a. Enkawl zawh tawk project la ila, scheme a awm vang ringawta bawhzui lovin kan ramin a mamawh dan zawk hi lal se kan ti, a ti bawk.
GPF chungchang pawh sawiin, GPF chu minister sawisak (recommend) kher lo va pek thin tur a nih thu a sawi a, “GPF leh pension hamthatna dangte kan pe chhuak hnem tawh hle,” a ti bawk.
“Sawrkar hnathawk hlawh hi mi tam tak ei leh bar innghahna a nih avangin officer chak lo bik leh tuanmuang fal awm lo va lo buaipui vat vat turin ka ngen che u a ni. Central scheme behchhana hlawh late hian harsatna an tawk nasa thin a. A chin fel dan kan ngaihtuah ho a tul hle,” chief minister chuan a ti a.
Mizoram mipuiten an beisei inrelbawlna tha (Good Governance) a awm theih nan project monitoring lamah nasa taka tan lak a nih thu sawiin, “Dashboard hmanga ka office atanga project zawng zawng lo endikna tur kan peih tep tawh. Service review committee pawh din turin thu kan chhuah a, aikal lak kan titawp a, biometric attendance kan kalpui tawh,” a ti bawk.
Nimina MFAS inkhawmpuiah hian member thar 10 lawmluh a ni a. Tun dinhmunah Mizoram Finance & Account Service Rules, 2021 angin post (cadre strength) hi 92 sanctioned an ni a, chung zinga 62 chu luah mek niin deputation post 2 leh ex-cadre post pakhat an luah bawk a, hna ruak hi 30 a awm mek a ni.